Meri

Meri geus ilahar diingu pikeun diarah endog jeung dagingna.^[3] Meri kasebut ingon-ingon anu hasilna bisa diandelkeun dibarung ku sipatna meri mah henteu gampang katerap hama, bisa dipiara ku jalan diangon (dileupaskeun ka sawah) bisa ogé maké cara intensifikasi (dipiara di jero kandang). ^[3] Meri ogé henteu hésé mangsa maraban ku lantaran mibanda sipat omnivorus (sagala dihakan) saperti : jujukutan, sayuran, tutut, lauk, beubeutian jeung sajabana.^[3][4]

Meri-meri anu kiwari baranahan tur loba dipiara téh turunan tina meri-meri liar anu hirup di alam bébas disebut ogé wild mallard, kajaba éntog (meri Manila) atawa muskovi anu asalna ti Amérika kidul.^[3] Anu ngabédakeun meri muskovi jeung meri séjénna taya lian ti ramo-ramona mibanda kuku-kuku anu sareukeut, tur bisa eunteup dina dahan tatangkalan.^[3]. Pangawakan leuwih datar (horisontal), leuwih badag, beuratna 3-3.5 kg di tempat asalna ieu meri dipaké pikeun indungan atawa purah nyileungleuman endog meri séjén.^[4]

Meri dina basa Inggris disebutna duck kecap duck asalna tina basa Inggris kuno (Anglo-xaxon) ;düce kecap pagawéana jadi ducan anu mibanda harti to duck atawa tungkul ka handap.^[2] Ieu ku lantaran nempo kabiasaan kulawarga meri anatidae mangsa keur nyiar kahakanan sok tarungkul teuleum ka jero cai.^[2]

 

Meri mibanda suku leuwih pondok dibandingkeun jeung awakna tur mibanda lamad anu ngalingkupan ramo-ramo sukuna pikeun ngabantu meri bisa manju kalawan gancang mangsa ngojay di luhureun cai.^[3] Meri anakna anu kakara megar mibanda bulu-bulu anu lemes.^[5] Meri mangrupa unggas anu mibanda sipat aquatic atawa mikaresep kana cai/ngojay.^[3] Katempo ogé bulu-bulu anu aya dina awakna kawilang kandel tur semu minyakan matakna cai henteu bisa asup kana awakna.^[3]

Meri-meri anu kiwari loba dipiara tur baranahan hususna di Indonesia, ujaring carita cenah baheula meri téh mimitina dibawa ku urang India ka pulo Jawa kurang leuwih dina abad ka VII.^[6] Taya lian maranéhna téh pagawé-pagawé anu ditugaskeun pikeun ngawangun candi-candi Hindu/Buda di pulo Jawa.^[6] Mangsa harita mah batu-batu anu diéntép jadi wangunan candi téh dirapetna maké endog bobodasna mun kiwari mah Portland Cement (PC).^[6] Pikeun nyumponan kabutuhan endog anu sakitu pohara loba, maranéhna mawa sorangan meri-meri endogeun ti nagarana pikeun diingu tur diarah endogna.^[6]

Salila ratusan taun meri geus jadi ingon-ingon anu loba diingu ku masarakat, hususna di daérah landeuh anu alus irigasina, deukeut rawa-rawa, situ jeung daérah sisi basisir.^[6]

Mangsa kolonial Walanda, kurang leuwih taun 1920 pamaréntah mangsa harita aya andil ogé dina nyebarna meri-meri ka sakuliah Indonesia.^[6] Taya lian ngaliwatan pagawé-pagawé kontrak anu ditempatkeun di Sumatra hususna di daérah Deli jeung Lampung.^[6] Urang walanda mangsa harita nyebut meri diurang téh Indichie leoopoend (indian runner).^[4] Mangsa kamerdékaan, pamaréntah mangsa harita mibanda hiji program pikeun ngaronjatkeun ékonomi masarakat anu katelah RKI (Rencana Kesejahteraan Indonesia).^[6] Ieu program téh mibanda tujuan salasahijina pikeun ngaronjatkeun kualitét meri lokal, ku jalan ngadatangkeun meri spésiés Khaki Campbell ti nagara Walanda, ogé Meri Peking anu diimpor ngaliwatan hongkong jeung Singapura.^[6]  

Meri-meri anu diingu dumasar kana maksudna dibédakeun kana tilu rupa:

Meri anu ngahaja dipiara pikeun diarah endogna (petelur), aya sababaraha spesies meri anu diingu pikeun diarah endogna :^[6]

1. Indiana Runner (Indische Loopeend) meri ieu aslina ti nagara Indonesia anu diintroduksi taun 1870 ka Amerika sababaraha spesies Indian Runner (white, buff, jeung fawn white).^[3] Meri ieu bisa nagtung ajeg kawas botol matakna disebut Runner, ngahasilkeun endog 180 siki dina sataun.^[3]
2. Khaki Campbell : Meri ieu asal muasalna ti Inggris hasil tina panalungtikan anu diayakeun ku Mrs. Campbell, ieu meri bisa ngendog 300 siki dina sataun, meri khaki cambell mah pang kasohorna.^[3][6]
3. Buff Orpington
4. Cayuga
5. Cherry Valley
6. Meri Jawa (Anas Javanica)
7. Meri Bali (Anas Sp)
8. Meri Bornéo (Anas Platurynchos Borneo)

 

Meri anu ngahaja dipiara pikeun diarah dagingna (pedaging) meri ieu kagolongkeun kana wels harlequin kasohor di Inggris masih kénéh turunan tina meri khaki campbell.^[3] Aya sababaraha rupa meri pedaging :^[6]

1. Meri Peking  : Meri ieu aslina ti Cina dina taun 1870 dibawa ka Amerika, ieu meri pedaging anu pangdipikaresepna di Amerika kidul jeung Australia. Bisa ngahasilkeun endog 130 siki dina sataun.^[3]
2. Meri Rouanieu meri asalna ti Prancis bisa ngahasilkeun endog 90 siki dina sataun, kelir endogna semu héjo kelirna.^[3]
3. Meri Aylesbury
4. Meri Muscovy atawa manila : bisana dipiara di pilemburan anu dimangpaatkeun pikeun nyileungleuman endog meri atawa hayam kampung, meri muscovy diurang mah disebut éntog.^[7] Biasana diabur kitu waé ngarah nyiar hakaneun sorangan saperti di balong, situ, rawa jeung susukan sakapeung anu nginguna méré parab tambahan sayuran jeung huut lembut.^[7]

Meri anu dipiara pikeun kabutuhan pangaresep wungkul (hobi), henteu mibanda tujuan pikeun diarah daging atawa endogna, aya sababaraha rupa meri hiasan :^{[3] [6]}

1. Mandarin (Aix galericuta).^[2], Blue Swedish, éast India, Call, Crested, jeung meri Wood
2. Meri manila (Anas Moschata)
3. Wood duck (aix sponsa) : bulu-buluna mibanda sababaraha kelir  : Cokelat, bodas, Hideung tur buleud beureum dina palebah panonna.^[2]

• Soang
• Daptar istilah anak sato
• Éntog
• Manuk
• Endog asin

• Swadaya, Niaga (2009). Panen Itik Pedaging Dalam 6 Minggu. Penebar Swadaya. ISBN 978-979-002-362-8. 
• Martawijaya, Elang Ilik (2004). Panduan Beternak Itik Petelur secara Intensif. PT Agro Media Perkasa. ISBN 979-3702-19-2. 
• Cherry, Peter (2008). Domestic Duck Production: Science and Practice. Biddles Ltd, King's Lynn. ISBN 978-0-85199-054-5. 
• Cherry, Peter (2008). Domestic Duck Production: Science and Practice. Biddles Ltd, King's Lynn. ISBN 978-0-85199-054-5. 
• Trubus, Exo (2008). Itik Duo, Bisa Pedaging bisa Petelur. ISBN 978-979-6369-86-4 Check |isbn= value (bantuan). 
• Bagus Harianto, Feily & (2012). 40 Hari Panen Itik Raja, Itik Pedaging Unggul. PT Agro Media Pustaka. ISBN 979-006-403-9. 

Artikel ieu mangrupa taratas, perlu disampurnakeun. Upami sadérék uninga langkung paos perkawis ieu, dihaturan kanggo ngalengkepan.

 

Baca ogé pedaran Wikikamus ngeunaan kecap

duck