Dursala

Dursala (atawa Dusala atawa Dussala) nyaéta ngaran saurang inohong dina wiracarita Mahabarata nyaéta adina Duryodana, pamingpin para Kurawa. Manéhna mangrupa hiji-hijina awéwé di antara anak-anakna Drétarata jeung Gandari.

Dina pawayangan Sunda jeung Jawa, Dursala mangrupa saurang lalaki, nyaéta anakna Dursasana. Sedengkeun ngaran adi awéwé Duryudana vérsi Sunda jeung Jawa mah nyaéta Dursilawati

Dina Mahabarata, Dursala mangrupa anak awéwé ti pasangan Dréstarata jeung Gandari. Manéhna mibanda saratus lanceuk lalaki, anu kakabéhanana kawentar ku sebutan para Kurawa. Sajaba ti éta, Dursala ogé mibanda baraya anu lahir ti selir nu ngaranna Yuyutsu.

Dursala ngadahup ka Jayadrata raja Karajaan Sindu sarta Karajaan Sauwira. Ti kawinan kasebut, lahir saurang anak nu dingaranan Surata. Jayadrata sorangan tiwas dina perang Baratayuda ku leungeun Arjuna. Sawatara taun sanggeus perang lekasan, incu Surata sempet tarung jeung Arjuna sabot Arjuna ménta upeti ti Karajaan Sindu dina raraga upacara Aswaméda anu diayakeun ku Yudistira.

Dina vérsi pawayangan Sunda jeung Jawa, adi awéwé para Kurawa anu kawin jeung Jayadrata ngaranna Dursilawati. Manéhna mibanda tabéat goréng nyaéta resep ngaheureuyan lalaki gandang, di antarana Arjuna, misanna sorangan.

Mimitina Jayadrata datang ka Karajaan Astina pikeun guguru élmu pamaréntahan ka Pandu, bapana para Pandawa. Tapi alatan Pandu geus maot, Sangkuni usaha narik Jayadrata pikeun jadi balad Kurawa. di antarana manéhna ngagunakeun kageulisan Dursilawati pikeun narik haté Jayadrata.

Jayadrata katarik atina sarta daék kawin jeung Dursilawati. Tapi nyanghareupan poé kawinan, Dursilawati leungit diculik ku hiji gajah bodas. Arjuna mantuan Jayadrata nimukeun Dursilawati sarta maéhan gajah kasebut.

Jayadrata jeung Dursilawati boga dua urang anak nu dingaranan Kartiwindu jeung Antisura. Kartiwindu saprak leutik diangkat anak ku Sangkuni. Dina perang Baratayuda Kartiwindu kabur ti médan perang mangsa kakuatan pihak Kurawa beuki ngipisan.

Antisura mah leutik kénéh sabot perang lumangsung téh. Manéhna meunangkeun pangampunan sarta ditarima jadi perwira Karajaan Astina dina mangsa pamaréntahan Parikesit, incu Arjuna. Antisura kawentar songong sarta resep ngagulkeun diri sorangan. Balukarna, hubungan manéhna jeung para perwira séjénna anu masih katurunan Pandawa kurang alus.

Dua anak Dursilawati, nyaéta Kartiwindu jeung Antisura jadi karaman dina pamaréntahan Parikesit. Kartiwindu ngarusak katingtriman Astina ti luar, sedengkeun Antisura ti jero kadaton.

Dursilawati sorangan tilar dunya mangsa perang Baratayuda lumangsung alatan nyawana dicabut ku Batara Basa minangka tumbal pikeun kameunang pihak Kurawa, hususna Jayadrata. Minangka buktina nyaéta kajayaan Kurawa dina poé ka-13 maéhan Abimanyu, anakna Arjuna.

Dina pawayangan Sunda jeung Jawa, Dursala nyaéta ngaran hiji lalaki, nyaéta anakna Dursasana, Kurawa nu kadua. Dina kalimah séjén, Dursala vérsi Sunda jeung Jawa nyaéta alona Dursilawati.

Di antara para Kurawa, Dursala nyaéta anu pangsaktina. Manéhna mibanda aji pangabaran anu bisa ngalumpuhkan kasaktian musuh. Dursala saterusna mingpin serangan pikeun ngarebut Karajaan Amarta jeung maéhan para Pandawa. Dina serangan kasebut, manéhna hasil ngéléhkeun Gatotkaca, anakna Bimasena, Pandawa nu kadua.

Gatotkaca ahirna hasil ngéléhkeun Dursala sanggeus manéhna meunangkeun élmu kasaktian anyar nu ngaranna aji narantaka anu diajarkeun ku Arya Seta, hiji pangéran ti Karajaan Wirata. Dina perang tanding kasebut, Dursala tungtungna tiwas ku leungeun Gatotkaca.

• Jayadrata