Kakteen

Kakteen
Unnerskeedelke Kakteen (Cactaceae)
Systematik
Riek: Plonten (Plantae) Oudeelenge: Trachetophyta Unneroudeelenge: Säidplonten (Spermatophytina) Klasse: Bedäkt-Säidere (Magnoiopsida) Oardenge: Nälken-Oardige (Caryophyllales) Familie: Kakteen (Cactaceae) Beskrieuwen fon JUSS.

Do Kakteen (Cactaceae) sunt een Plonten-Familie, ju mäd Uutnoame fon een Oard (Rhipsalis baccifera) fon Natuur uut bloot in Amerikoa foarkumt. Besunners in dät Suude fon do Fereende Stoaten fon Amerikoa (foaraaln Arizona un Kalifornien juust so as in Deele fon Mexiko rakt dät heele Lounskuppe, do fon Kakteen bestimd wäide. Die Saguraro (Carnegiea gigantea) is aan grooten Boom-Kaktus uut düt Rebät, die Neerenge un Lieuwendsruum foar hunnerde uur Lieuweweesen bjudt. Kakteen konnen litjet as Kruud weese, man uk in Struuk of sogoar Boomfoarm woakse. Pachycereus pringlei is mäd bit tou 19 Meetere Hachte die grootste Kaktus, wilst die litste Kaktus Blossfeldia liliputana bloot ne Truchmäite fon 12 Millimeetere häd. Dät honneld sik toumaast uum sukkulente, stiekelige Plonten, licht tou ferwikseln mäd ferskeedene ooldwaareldske Euphorbien, do so ännelk uutsjo, uk wan jo neen Kakteen sunt. Wäkke Kakteen-Oarde groie däälich uk fuul buute hiere uurspröängelke Heemat. So sunt Oarde uut dän Sleek fon do Fiegenkakteen (Opuntia) uk fuul in ju Middelmeer-Ruumte ferspradt, besunners ju Oard Opuntia ficus-indica, ju tou't Aadenjen fon Kaktus-Fiegen uk fuul fon italieenske Buuren ounbaud wäd. Wäkke Kakteen wäide uk as Drogen bruukt, so t.B. die Meskalin-hoolderge Peyote-Kaktus (Lophophora williamsii), die in dän synkretistisken Kult fon wäkke noud-amerikoanske Indioanere een groote Betjuudenge häd (Native American Church).

Ju Plonten-Familie fon do Kakteen mäd sowät 100 bit 130 Sleeke un 1500 bit 1800 Oarde wäd in fjauer Unnerfamilien apdeeld:

• Cactoideae EATON
  änthoaldt moor as 85 Prosänt fon do Oarde, bolde aaltied totoal bleedloose Plonten sunner Glochiden un mäd Säid sunner Säidmoantele.

Biespiele:

• 
  Sweegermuur-Stoul (Echinocactus grusonii)
• 
  Saguaro (Carnegia gigantea)
• 
  Blossfeldia liliputana
• 
  Rhipsalis baccifera

• Opuntioideae BURNETT
  änthoaldt sowät 300 Oarde: Plonten mäd prüünfoarmich reduzierde, sukkulente, man aiske kuutlieuwige Bleede, Glochiden, un maast ljoachtfaawerge Säid mäd aaltied steenhädden Säidmoantel.

Biespiele:

• 
  Opuntia ficus-indica, een Oard fon Fiegen-Kaktus
• 
  Austrocylindropuntia subulata
• 
  Maihueniopsis subterranea

• Pereskioideae ENGELM.
  änthoaldt aan Sleek (Pereskia) mäd sowät 16 Oarde: Nit bit swäk sukkulente Plonten (C₃-Plonten) sunner Glochiden, mäd ful äntwikkelde Loof-Bleede un groote swotte Säidkoarne sunner Säidmoantele.

Biespiele:

• 
  Pereskia aculeata
• 
  Pereskia lychnidiflora
• 
  Pereskia zinniiflora

• Maihuenioideae P.FEARN
  änthoaldt aan Sleek Maihuenia mäd bloot two Oarde: Mattenbieldende Plonten äänelk do Opuntioideae, man mäd loanger lieuwende Bleede, swotte Säid un sunner Glochiden.

Biespiele:

• 
  Maihuenia patagonica
• 
  Maihuenia poeppigii