Lemmee aalmuglâšmecci
Lemmee aalmuglâšmecci lii ive 1956 vuáđudum aalmuglâšmecci Aanaar já Kittâl kieldâi kuávlust. 2 850 km² vijđosâžžân tot lii Suomâ stuárráámus aalmuglâšmecci já meid ohtâ Euroop stuárráámusâin meccikuávluin. Aalmuglâšmeeci rasta kolgá puáris pecivuovdij pirâstittem, paijeel 70 km kukkosâš Lemmeejuuhâ. Ton stuárráámus tuodârkuávluh láá Márástâh já Viibuštuoddâreh. Puáris vuovdijn já vijđes jeegijn šaddeh maaŋgah uhkevuálásiih šadoh tego aarnik, jegginartte, lyeiveeluhtee, tavehäldeelukkâ, kiäpuhäldeelukkâ, nuorttâkäiski, piikkisiemâ, kiemâpuálččimieđâš já kieddihäldeelukkâ. Härvinâš ketki lii aalmuglâšmeeci tubdâldâhšlaajâ. Lemmee kuávlust láá meerhah ovdâhistorjálijn aassâmsoojijn já koddepivdemist. Pisovâš aassâm šoodâi 1800-lovo loopâst, ko puásuituálu aalgij kuávlust. Taan ääigi stuárráámus uási aalmuglâšmeeci kuávlust kulá Sallâvääri palgâsân. 1940-lovvoost Lemmest tábáhtui stuorrâ kollekurgâlem. Suullân 10 000 vandârdeijed eelih Lemmest jyehi ive.[1]