جعفر الصادق

دانشگاہ امام جعفر صادق رحمۃ اللہ علیہ دی خصوصیت ہئی کہ امام صیہب استعداد تے ذوق و شوق دے مطابق علوم و فنون دے مختلف شعبیاں وچ مہارت دی حد تک تربیت فرمیندے ہن۔ جیہڑا جتنا سوال کریندا ہئی ،جیندا جتنا تے جینجھا ظرف ہوندا، امام اونہی دے مطابق اونکوں فیضیاب کریندے ہن۔ کݙہیں تاں ایویں وی تھیندا کہ امام ݙسݨا چاہندے ہن لیکن ظرف قابل ہی نہ ہوندا ہئی، چنانچہ ہک شخص امام صیہب دے ہمراہ مختلف امور تے ڳالھیں کریندا نال ویندا پیا ہئی، اوں دوران انہاں دا گزر مسگراں دے بزار اچوں تھیا، اوں شخص نے پچھیا: مس کینکوں آہدن؟ امام صیہب نے فرمایا: فاسد شدہ چاندی ہے، لیکن ایندی ہک خاص دوا ہے، جیندے ذریعے دوبارہ اینکوں خالص چاندی وچ تبدیل کریج سڳدے، پر سائل نے اوں دوا دے بارے آپ کولوں پچھا ہی نہ۔ ہک جرمنی محقق نے سائل دی ایں غفلت تے نہایت افسوس دا اظہار کیتے۔

امام صیہب نے بہت پہلے اکسیجن دی خصوصیات دی طرف اشارہ کیتا تے ݙسا کہ ہوا عنصر بسیط نی بلکہ مختلف عناصر توں مرکب ہے، جیندے وچوں بعض اجزاء ہر زندہ موجود دے ساہ گھنݨ وچ مدد کریندن تے بعض اجزاء بھاہ پیدا کرݨ وچ معاون ہوندن۔ اگر ہوا دے اندر موجود عناصر دا تجزیہ کیتا ونڄے تاں اوہ اجسام وچ نفوذ کرسڳدن تے لوھے کوں پگھار سڳدن۔

۱۳۰۰ سال پہلے دانشگاہ امام جعفر صادق رحمۃ اللہ علیہ وچ زمین تے سجھ دی حرکت تے کرویت دے بارے بحث و گفتگو تھیندی ہوندی ہئی، انہاں دا نظریہ ایہ ہئی کہ زمین گول ہے جیہڑی اپݨے گرد چکّر لیندی ہے تے گردش لیل و نہار زمین دی حرکت کے سبب ہے نہ کہ سجھ دے۔ آپ سجھ دی حرکت کوں مستدل طریقہ نال محال ثابت کریندے ہوئے فرمیندن کہ زمین اپݨے گرد حرکت دی وجہ توں زمین دا نصف حصہ روشن تے ݙوجھا حصہ اندھارے وچ کڄا ہویا ہوندے۔