Québec

Coordinadas: 52°N 72°W / 52°N 72°W52; -72

Su Québec [kebɛk] est una provìntzia de su Cànada tzentru-orientale. Est sa sola provìntzia de su Cànada chi tèngiat majoria de populatzione de limba mama frantzesa, chi est fintzas sa sola limba uffitziale de sa provìntzia. Su cabulogu est Québec, sa bidda prus manna Montréal.

Su Québec tenet istèrrida de 1,542,056 km2 e populatzione de unos 8 milliones de bividores. Est sa provìntzia prus istèrrida de totu su Cànada e sa segunda prus manna divisione amministrativa (sa prima est su territòriu de Nunavut).

Allàcanat in su sud-uestu cun sa provìntzia de Ontàrio, in s'uestu cun is bajas de James e Hudson, in su norti cun s'istrintu de Hudson e sa baja de Ungava, in s'estu cun su gulfu de Santu Larentzu e is provìntzias de Terranova e Labrador e Nou Brunswick. In su sud allàcanat cun is istados USA de Maine, New Hampshire, Vermont e New York. Ispartzit fintzas làcanas marìtimas cun su territòriu de Nunavut, Ìsula de su Prìntzipe Eduardu e Noa Scotia.

Su Québec est sa segunda provìntzia prus populada de su Cànada a segus de s'Ontàrio. Sa prus parte de is bividores bivet in àreas urbanas a curtzu de su frùmene Santu Larentzu in s'àrea intre Québec e Montréal. Is communidades chi faeddant inglesu sunt cuntzentradas in s'uestu de s'ìsula de Montréal, ma si nd'agatant fintzas is regiones de Outaouais, Eastern Townships, e Gaspé. Sa regione de Nord-du-Québec, posta in sa parte prus setentrionale de sa provìntzia, est pagu bìvida e mescamente de pòpulos nadios.

In sa polìtica de sa provìntzia sa chistione de s'indipèndentzia tenet unu rolu primàrgiu. Is guvernos amministrados de su Parti Québecois ant fatu referendum subra sa soberania in su 1980 e in su 1985; in totu is duos casos su proponimentu est istadu rebusadu de is votantes, ma sa segunda borta su màrgine de votos est istadu mada istrintu. De is anàlisis de is resultados regionales est resurtadu chi ma majoria de is votantes francòfonos aiat votadu pro su Oui. In su 2006, sa House of Commons de su Cànada at passadu una motzione simbòlica chi reconnòschet su Québec che una natzione a intro de su Cànada aunidu.

Mancari is risursas naturales de sa provìntzia sunt istadas pro tempus meda longu s'apògiu printzipale de s'economia, fintzas su setore aero-spatziale, is tecnologias de s'informatzione e de sa comunicatzione, sa bio-tecnologia e s'indùstria farmatzèutica tenent rolu de primàrgiu e ant dadu contributu mannu a fàghere de su Québec una provìntzia meda influente in s'economia Cànada, in ue est segundu isceti a s'Ontàrio.

Wikimedia Commons tenet files chi ligant a: Quebec