NHK ni Yōkoso!

Benebènnios a sa NHK (NHKにようこそ! En Eichi Kei ni yōkoso!) est unu contu nàschiu a su comintzu comente romanzu chi aiat iscrittu Tatsuhiko Takimoto e battìu a pustis, abberguau su sutzessu, in manga e anime. S'istoria contat sa pelea psicologica de unu zovanu hikikomori e NEET (Not in Education, Employment or Training ovverosiat "pessone chi non tenet traballu e nemmancu nde chircat, in prus a non istudiare") e su rapportu difficurtosu chi tenet chin atteros de connoschentzia sua; est unu pacu autobiografica, ca s'autore etottu at viviu unu periodu de hikikomori. Mancari chi trattet mascamente de su fenomenu hikikomori e de cussu NEET, si colat fintzas pro atteras subcurturas de su Giappone, comente a s' hotaku, lolicon, s' Offline meeting (vortada a sa littera "adobiu offline", jocu de paragulas pro inditare sa pessona che unu computer e sa morte pro manu sua comente s'"istudada" de sa vida sua), e goi sichinde.

Tatsuhiro Satō est unu zovanu de bintiduos annos, sotziofobicu e paranoide, chi dae battor oramai vivet serrau in sa domo sua de Tokyo chi aiat picau in affittu; issu est s'istereotipu de s'hikikomori fattu pessone: abbarrandesiche semper in domo, est arribau a su puntu de non tenner prus ligamine perunu chin su mundu esternu e si mantenet petzi chin sa paca chi babbu e mama sua li mandan (pro custu est fintzas unu NEET).

Una die chi pariat colande a sa solita manera, accumpanzada petzi dae tristura e apatia, a sa janna sonat e si presentat una femina betza chind una zovanedda a costazu pro facher propaganda religiosa; sa pitzocca, chi si narat Misaki Nakahara de lumen, a pustis atzapat una manera pro cuntattare Sato, nandeli chi connoschiat sa manera pro che lu sanare dae sa cundissione sua de hikikomori, a pattu de firmare unu cuntrattu e de sichire carchi lessione privada chi a posta pro issu diat tenner a sero, in su parcu. Mancari chi Satō a su cumintzu non si fidet meda tentande de che bocare s'offerta dae conca sua, a sa fine ja atzetat fachende su chi Misaki li pediat. Issa paret timida a su nessi cantu Satō, ma non cheret narrer nudda de pessonale chi la riguardet, goi puru proitte li ponzat semper in fattu. Colan dies e dies e su zovanu paret mezorande, finas a cando connoschentzias suas de su passau non che torran a essire a campu e li prenan sa conca de tottus sos problemas issoro.

In Giappone, sa sigla NHK est sa telebisura prubbica pacada chind unu canone e cheret narrer Nihon Hōsō Kyōkai, nodia e fentomada pro tottus sos anime de sutzessu mannu; In Welcome to the NHK diventat peroe s'acronimu de Nippon Hikikomori Kyōkai "sòtziu de sos hikikomori giapponesos". A pustis de un'allucinassione pro more de carchi droga legale, difattis, su protagonista cumintzat a pessare chi s'istadu de hikikomori siat funtzionale in tottu e pro tottu a sa retza televisiva, chi si nde ponet a criare semper de prus pro che balanzare dae issos.

Comente Sato affirmat siat belle a su cumintzu siat a s'acabbu de su romanzu, s'organitzassione de tìmmer NHK no est ateru chi unu pantàsima chi Sato si fachet a bella posta pro che ghettare dae pala in coddu a unu inimicu esternu tottu su male chi nde est issu etottu responsabile. Pompiande prus a tardu sos problemas de sos ateros, si cumbinchet chi sa NHK siat fachende falare ind una trampa manna fintzas sos ateros chi li sun a inghiriu in sa vida sua. Tando, de custa manera, sa NHK est un'acronimu fatzile a mudare:

Pro esempiu, pro sa senpai de Sato, cheret narrer Nihon Hiyowa Kyōkai (sotziu giapponesu de sa dèbile zente) e pro Misaki Nihon Hikan Kyōkai (sotziu pessimista giapponesu).

• Tatsuhiro Satō (佐藤 達広 Satō Tatsuhiro)

Issu est su protagonista assolutu de s'istoria contada; zovanu sensibile e influentzabile meda, est diventau unu hikikomori dae cando aiat lassau s'universidade abbarrandesiche in domo sua pro belle battor annos, timende chi sa zente li ridiat a palas e nde nabat male. Sicomente sa senpai sua, Hitomi Kashiwa, li aiat prenau sa conca de cumplottos in tottube, at fintzas isviluppau una pessonalidade paranoide credende chi sa cundissione penosa inube est como dipendat abberu dae unu cumplottu mannu e secretu de sa retza televisiva NHK. Vivet chind una paca chi sos mannos suos li dan cada mese. At a azudare Yamazaki pro cantu pertocat sa trama de un'eroge (jocu pro adultos).

• Misaki Nakahara (中原 岬 Nakahara Misaki)

Una pitzocca misteriosa chi narat de connoscher una manera sicura pro isorvere sa cundissione de hikikomori de Satō; issa non cheret narrer nudda de sa vida privada sua, ma poi paret craru e ladinu chi tenzat problemas mannos che a issu, si non de prus.

• Kaoru Yamazaki (山崎 薫 Yamazaki Kaoru)

Un'hotaku chin sa fissa de anime e manga a protagonista femininu; Satō l'aiat dau azudu pro lu difendere dae un'attu de bullismu chi fit subinde, e como vivet accant'e domo sua attendende a un'iscola professionale. Est issu chi at a facher de Satō un'hotaku-lolicon.

• Hitomi Kashiwa (柏 瞳 Kashiwa Hitomi)

Una cumpanza, fintzas sa senpai, de Satō. Comente chi non li bastet una depressione manna chi tentat de che bocare ingurtinde pasticcas, tentande puru de si uchidere, est una paranoide cumplottista e influentzat meda Satō chind unu contu de cumplottu in fattu de s'atteru.

• Megumi Kobayashi (小林 恵 Kobayashi Megumi)

Una vorta fit sa rappresentante de classe inube Satō istabat. Severa de zudissiu siat chin sos atteros siat chin issa etottu, a pustis de patire fricaduras in su locu de traballu est diventada una pessone cinica e manipuladora, custretta a attendere a su frade suo hikikomori dandeli itte mandicare, e disposta a gruspire e appettigare puru sos amicos suos chenza bi pessare duas vortas.