Albina Angioni

Custu artìculu est iscritu cun sa grafia Limba Sarda Comuna. Abbàida sas àteras bariedades gràficas:

campidanesu · logudoresu · nugoresu

Albina Angioni (Pauli, 20 de trìulas de su 1936 – Pauli, 4 de trìulas de su 2012) est istada una poetissa, iscritora, commediògrafa e istudiosa sarda.

Albina Angioni naschet su 20 de trìulas de su 1936 in Pauli, sa prus manna de ses fìgios de Saturnina, mastra de partu, e de Albinu, carabineri, ambos originàrios de Sestu. Sa famìlia s'at a tramudare a Tonara, in Barbàgia, pro more de sos bumbardamentos americanos, e at a torrare a domo sua a pustis.

A noe annos benit corfida dae una maladia reumàtica, chi l'at a causare problemas a a su coro e chi l'at a afigire pro totu sa bida sua.

S'iscriet a su litzeu sientìficu Michelangelo de Casteddu, e a pustis a s'Universidade de sa tzitade, in ue s'at a laureare in Potecaria.

A metade de sos annos '50 si cojuat cun Cesello Dessí, unu campione sardu de tziclismu. In su 1959 si torrat a iscrìere a s'Universidade, in sa facultade de Sièntzias Naturales, laureende·si in pagu tempus.

Pro unos cantos annos faghet sa farmacistae, a pustis, si dedicat a s'insegnamentu de sa matemàtica e de sas sièntzias, in sas iscolas mèdias e superioras pro 25 annos. A sa fine de sos annos '90, incumentzat a iscrìere e a publicare in sardu versos, contos e cummèdias.

In su 2000 le dant su prèmiu "Alziator" pro s'òpera poètica "Pensamentos".^[1]

Sa prima publicatzione, est de su 2002, e est una regorta de poesias chi si mutit Inbentu sa luxi - Poesias (Editziones Grafica del Parteolla). A pustis, colat dae sas poesias a sas cummèdias. Sa prima cummèdia sua est Sa rebelliòni de is maladìas, chi essit in su 2003 e benit rapresentada in Pauli, in su 2005, dae sa cumpangia teatrale Filodrammàtica Lassalliana, in su teatru de s'Iscola de su Pitzinnu e in s'àmbitu de sa rassegna teatrale “S'Arruga noa”, chi cuddu annu fiat istada dedicada a “Sa fèmina sarda tra deventali e muccadori” e prus in generale a sa figura feminile in su teatru sardu.^[2] In su 2010 l'ant torrada a rapresentare.

Sa de duas cummèdia est Sa littra de mariedda, publicada in su 2006, chi benit rapresentada, semper dae sa Filodrammàtica Lassalliana, in su 2007^[3]e, torra, in su 2013.^[4] Sa sua de tres e ùrtima cummèdia est Sa Partenza - Sa prenetta de Giuditta Cadena, publicada in su 2008.

• Albina Angioni, Inbentu sa luxi - Poesias, Patiolla, Grafica del Parteolla, 2002, ISBN 978-88-88246-16-1.
• Albina Angioni, Sa rebelliòni de is maladìas, Patiolla, Grafica del Parteolla, 2003.
• Albina Angioni, Sa littra de mariedda e contus de su tempus chi currit, Turistel, 2006, ISBN 9788890230905.
• Albina Angioni, Sa Partenza - Sa prenetta de Giuditta Cadena, 2008.

1. ↑ (IT) A due scrittrici il primo riconoscimento per le sezioni poesia e racconti Premio "Alziator", in La Nuova Sardegna, 8 gennaio 2000. URL consultadu su 3 maju 2020 (archiviadu dae s'url originale su 3 làmpadas 2020).
2. ↑ (IT) I Rassegna-S’Arruga-Noa-2005, in Associazione Culturale Filodrammatica Lasalliana. URL consultadu su 22 maju 2020.
3. ↑ (IT) Sa littra de Mariedda 2007, in Associazione Culturale Filodrammatica Lasalliana. URL consultadu su 22 maju 2020.
4. ↑ (IT) VIII RASSEGNA S’ARRUGA NOA 2013, in Associazione Culturale Filodrammatica Lasalliana. URL consultadu su 22 maju 2020.

• (IT, SC) Francesco Casula, Letteratura e Civiltà della Sardegna - Volume III - Il Teatro in Lingua Sarda, Patiolla, Grafica Del Parteolla, 2020, ISBN 978-88-6791-231-5.