Matteu Bonellu

Matteu Bonnel, o Bonellu, n latinu Mattheus Bonellus o Bonnellus (1125/1130 – Palermu, 1161), fu nu nòbbili nurmannu dâ curti di Gugghiermu lu Malu, e signuri di Càccamu. Mpricatu ni nu cumplottu contra l'ammiragghiu Maiuni di Bari, di cui fu lu mannanti di l'ammazzatina ntô 1160, Matteu Bonellu avìa nu certu appoggiu dâ pupulazzioni e di na parti dâ nubbiltà siculu nurmanna ca cuntistava la curti di Gugghiermu, e li favura fatti ê mussurmani dâ curti, chi all'èbbica avìanu rispunsabbilità mpurtanti ntô cuvernu.

Lu 9 di marzu dû 1161 capiau na summossa contra lu stissu re Gugghermu, ca fu puru arristatu e distituitu. La summossa pirò falliu, pi lu ntirventu di l'esercitu dû re. Gugghermu potti siri libbiratu, Bonellu fu misu n carciri, turturatu, e lassatu mòriri picca tempu doppu.