نجات

نجات (Nijaat)، پاکستان ٹیلی ویژن کارپوریشن، کراچی سینٹر دا اک ڈراما اے جیہڑا 1993ء وچ نشر ہویا۔ ڈرامے وچ پاکستان وچ عورتاں دے مُختلف کردار تے مسائل دی عکاسی کیتی گئی اے۔ ایہ خاندانی منصوبہ بندی، چائلڈ لیبر دے خاتمے تے کمِیوُنِٹی ہیلتھ اصلاحات اُتّے زور دین٘دا اے۔ ڈراما اردو زبان وچ بݨایا گیا اے پَر وچ وچاݪے اردو دے ناݪ پنجابی زبان دی ورتوں وی کیتی گئی اے۔ ڈرامے دِیاں اٹھاراں قِسطاں نیں۔ ڈرامے دی ڈائریکٹر ساحرہ کاظمی نیں تے لکھاری اصغر ندیم سید نیں۔

ایہ ڈراما اک بستی وچ تن خانداناں دیاں آپس وچ جُڑیاں کہاݨیاں اُتے مبنی اے: زرینہ، اک ہیلتھ ورکر، تے اوہدا خاندان؛ ساجدہ تے حضور بخش، جیہناں دے اینے بچّے نیں کہ ساجدہ دی صحت خراب رہندی اے۔ تے علی اسد، اک مقامی اسسٹنٹ کمشنر تے اوہدی بیوی تانیا۔ ڈراما ایہناں دیاں آسّاں تے مایوسّیاں دی نشاندہی کردا اے۔ اوہ ماضی نوں قربان نہ کرن دی کوشش کردے ہوئے اک بہتر مستقبل لئی جدوجہد کردے نیں۔

آفتاب ایسوسی ایٹس (پرائیویٹ) لمیٹڈ، لاہور، پاکستان دے ذریعے جانز ہاپکنز یونیورسٹی/ پاپولیشن کمیونیکیشن سروسز (JHU/PCS) نوں معاہدے اُتّے ایس ڈرامے دے سماجّی اثرات دا جائزہ لیݨ لئی اک سٹڈی کیتی گئی۔ ایس سٹڈی لئی انٹرنیشنل ڈویلپمنٹ ریسرچ سینٹر (IDRC)، کینیڈا نے تعاون فراہم کیتا سی۔ 'نجات' (تے انڈونیشیا دے 'الانگ-الانگ') دے معیاری جائزیاں توں نتائج دی افادیت JHU/PCS تے فِلم سازاں دے درمیان مزید تعاون دا باعث بݨی اے۔