Repùblica Àraba Saharawi Democràtica

La Repùblica Àraba Saharawi Democràtica ò RASD a l'é un pais dl'Àfrica dël Nòrd.

A confin-a con Maròch, Algerìa e Mauritania e a l'é bagnà da l'Océan Atlàntich.
La capital a l'é El Ayun, ant la part dël pais ocupà dal Maròch; la capital "ad interim" a l'é Bir Lehlu, ma 'l govern an esili a sta a Tindouf, an Algerìa.
A l'ha na surfassa ëd 266.000 km² e a conta anviron 270.000 abitant.

Ël Sahara Ossidental a l'é stàit una colònia dla Spagna fin al 1976.
Quand che la Spagna a l'é ritirase, ël Maròch a l'ha ocupà ij doi ters dël pais, a nòrd, e la Mauritania la part pi a sud.
Ël 27 ëd fërvé dël 1976 ël Front Polisari a l'ha proclamà l'indipendensa dël pais, con ël nòm ëd RASD.
Dël 1979 la Mauritania a l'é ritirase dal Sahara e 'l Maròch a l'ha ocupà n'àutra part dël pais.
Al di d'ancheuj la RASD a controla apopré ël 20% dël teritòri e vàjre Saharawi a vivo da pròfugh ant ël sud ëd l'Algerìa.

La Repùblica Àraba Saharawi Democràtica a l'é stàita arconossua da vàjre pais ëd l'Àfrica e dl'América latin-a e a fa part ëd l'Union African-a.
Ël president a l'é Mohamed Abdelaziz (dal 1976).
Ël prim ministr a l'é Abdelkader Taleb Oumar (dal 2003).