Hugo Chávez

Hugo Chávez
Di 64 presidente di Venezuela
Termino di oficina 2 februari 1999–5 maart 2013
Antecesor	Rafael Caldera
Sucesor	Nicolás Maduro
Informacion personal
Nacemento	28 di yüli 1954 Sabaneta
Fayecimento	5 di mart 2013 Hospital Militar de Caracas
Informacion profecional
Ofishi	politiko
Firma
Website oficial
[Edita Wikidata] · [Manual]

Hugo Rafael Chávez Frías (☆ 28 di juli 1954 na Sabaneta, Venezuela - † 5 di maart 2013 na Caracas) tabata un politico Venezolano, cu a sirbi desde 1999 te su fayecimiento como presidente di Venezuela. Chávez tabata lider di e Movimiento Revolucion Bolivariana-200. E tabata promove un doctrina politico di democracia participativo, socialismo y Latin America y cooperacion Caribense, y tabata un critico di neoliberalismo, globalisacion y politica exterior di Merca^[1].

Chávez a nace den un famia di seis yiu en total. Su mayornan, Hugo de los Reyes Chávez y Elena Frías, tabata docente di enseñansa basico. Chávez a nace y crece na Sabaneta, den estado Barinas. Su famia tabatin un situacion economico humilde, posiblemente esaki a causa e decision di e mayornan di Chávez pa pone su educacion y di su ruman Adán den man di su wela, Rosa Inéz Chávez.^[2] Desde edad jong el a mustra interes den un variedad di arte y deporte, baseball specialmente.

El a completa su enseñansa secundario na e Liceo Florentino O’Leary, unda el a gradua cu su 17 aña. Despues di su graduacion, el a drenta e Academia Militar de Venezuela na Caracas, unda el a studia pa cuater aña. Su meta original tabata pa uza e estudio aki como un manera pa drenta baseball profesionalmente, ya cu e Academia Militar tabata conoci pa tin bon coach di baseball. Sinembargo, su abilidadnan den e deporte no tabata suficiente pa practic'e profesionalmente. Di tal manera cu el a dicidi di termina su estudio na e academia, aunke su cifranan no tabata halto. ^[3]

Chávez a fayece na 2013 na Cuba, despues di lucha contra di cancer pa casi dos aña. Chávez tabatin edad di 58 aña. Prome cu su morto, el a declara Nicolás Maduro como su sucesor oficial y lider di e Revolucion Bolivariana y su partido politico PSUV (Partido Socialista Unido Venezolano).

Na 1989, Carlos Andrés Perez a wordo elegi como presidente di Venezuela. El a compromete su mes cu un promesa politico na e pueblo Venezolano cu e no lo traha hunto cu e IMF y e Washington Consensus di e gobierno Mericano, pero a haci lo contrario ora el a tuma e puesto. Protestanan contra Perez su gobierno a resulta den opresion violento y masacre di protestantenan na man di polis politico y e ehercito. E evento aki a keda conoci como El Caracazo. E gobierno di Perez a declara cu 276 morto a cay, pero otro organisacionnan ta estima cu e cantidad di morto tabata mas halto cu 2.000. Chávez, cu na e momento ey tabata un funcionario militar, no a participa den e accionnan.

Despues di e Caracazo, Chávez a plania un golpe di estado contra di e gobierno di Perez, bou di e nomber "Operación Zamora". E golpe a wordo intenta riba 4 di februari 1992, pero a fracasa. Chávez a entrega su mes na gobierno. Chávez a duna un speech na television despues di su entrega, unda e ta declara cu e fracaso ta temporario. Chávez su popularidad a crece, especialmente entre e pobernan di Venezuela.

E meta di e asina yama 'mision bolivariano' tabata pa combati malesa, alfabetisacion, desnutricion, pobresa y otro mal social. Den asuntonan exterior, Chávez tabata contra e Washington Consensus door di yuda model alternativo di e desaroyo economico y el a pidi cooperacion entre e nacionnan pober, especialmente esnan di Latino America. Su influencia politico den Sur America, pa medio di e dependencia di petrolio di Venezuela y suconfrontacion regular cu Merca a dun'e un profil geopolitico halto. Como resultado cu e revista Time a inclui Chávez den e lista di e personanan cu mas influencia rond mundo (100 most influential people) den 2005 y 2006.^[4][5]

Chávez a funda e partido politico, Movimiento V República, despues di a faya di derota presidente Carlos Andrés Pérez den e eleccion presidencial di aña 1992. Chávez a wordo elegí como presidente na aña 1998 cu un campaña promoviendo su plan pa yuda e poblacion sufriendo di pobresa na Venezuela. El a gana cu 56.20% di e votonan contra di Henrique Salas Römer, un economista educa na universidad di Yale, cu a recibí 39.97% di e votonan.

Na juli di 2000, Chávez a wordo reelegí como presidente, ganando cu 59.76% di e voto contra Francisco Arias Cárdenas, cu a participa cune den e golpe di estado di 1992. E aña ey, Chávez a cuminsa exporta petrolio pa Cuba den un intercambio pa docternan Cubano. E prome protesta contra su gobierno a tuma luga na januari di 2001 como resultado di reformanan di educacion cu lo a introduci mas elementonan di e Revolucion Bolivariana den bukinan di scol.

Na december 2006, Chávez a wordo reelegi pa un di tres mandato como presidente di Venezuela. El a gana cu 63% di e voto contra di, entre otro, Manuel Rosales. Riba 15 di december 2006, Chávez su partido a uni forsa cu otro partidonan socialista cu a apoye den pasado pa forma un partido mas grandi yama "Partido Socialista Unido Venezolano" (PSUV). Den 2007 a miembresia di e partido a crece te cu 5.7 miyon hende. Na juni 2011, Chávez a anuncia cu e tabata recuperando di un cirugia pa opera un tumor canceroso. Mas despues, e gobierno Venezolano a declara cu e tumor no por a wordo opera completamente.

Na October 2012, Chávez a gana su di cuater eleccion pa presidencia, contra di Henrique Capriles Radonski, cu 54% di e voto mientras Capriles a haya 45% di e voto. Riba 5 di maart 2013, Nicolás Maduro a anuncia e morto di presidente Chávez. No a wordo revela ki tipo di cancer Chávez tabatin, ni tampoco ki tipo di tratamento el a ricibi. Un luna despues, Chávez su vicepresidente Maduro a wordo elegi como presidente di Venezuela.