Silvèri

Silvèri (mòrt lo 20 de junh ò lo 2 de decembre de 537) foguèt lo 58^en papa de la Glèisa Catolica Romana dau 1^èr ò dau 8 de junh de 536 a març ò au 11 de novembre de 537. Succediguèt a Agapet I^èr (535-536) e foguèt remplaçat per Vigili (537-555).

Silvèri èra lo fiu legitim dau papa Ormisdas (514-523) nascut avans l'intrada au sen de la Glèisa de son paire. Son pontificat foguèt brèu e marcat per lei conflictes ambé lei Bizantins. Premier, refusèt la reabilitacion dau patriarca Antim de Constantinòble destituit per Agapet I^èr en causa de son sostèn a l'eretgia monofisista. Aquò li vauguèt l'ostilitat de l'imperatritz qu'organizèt divèrsei complòts còntre eu.

Pasmens, lo 9 de decembre de 536, Silvèri aprovèt l'intrada dei tropas dau generau bizantin Belisari dins Roma mai lei relacions entre lei dos òmes de desgradèron. Ansin, dins lo corrent de la còntra-ofensiva deis Ostrogòts e dau sètge de Roma, Belisari arrestèt e estremèt lo papa après d'acusasions de traïson. Puei, lo despausèt e lo remplacèt per Vigili. Silvèri foguèt lo premier papa obligat d'abdicar. Refusant de laissar la papautat a seis adversaris, anèt a Constantinòble onte l'emperaire Justinian li donèt rason. Dins aquò, Vigili aprofichèt aqueu viatge per renfòrçar sa posicion. Au retorn de Silvèri, èra vengut pron poderós per l'arrestar tornarmai e l'exilar dins l'illa preson de Ventotene. Silvèri i moriguèt avans la fin de l'annada dins de circonstàncias desconegudas.