Sadi Carnot (fisician)
Nicolas Léonard Sadi Carnot (1èr de junh de 1796, París - 24 d'aost de 1832, Ivry-sur-Seine) foguèt un fisician e un engenhaire francés de la premiera partida dau sègle XIX. Es considerat coma lo « paire de la termodinamica ».
Fiu dau scientific e revolucionari francés Lazare Carnot (1753-1823), foguèt lo premier qu'estudièt lei transferiments de calor d'una maquina de vapor e lei cicles dau motor. Descurbiguèt lo segond principi de la termodinamica (o principi de Carnot) e formulèt son premier enonciat. Sei trabalhs foguèron publicats en 1824 dins l'obratge Réflexions sur la puissance motrice du feu (Reflexions sus la poissança motritz dau fuòc en occitan). Èran devesits entre cinc partidas principalas tractant de la calor e la poténcia motritz, dau cicle ideau d'un motor perfèct (d'ara endavant dich cicle de Carnot), de la reversibilitat d'aqueu cicle, deis aplicacions de sei descubèrtas a la fisica dei gas e enfin de la possibilitat de crear un motor d'èr. Pasmens, maugrat una presentacion positiva a l'Academia dei Sciéncias per Pierre-Simon Girard (1765-1835), gaire de scientifics èran capables de comprendre la portada de son òbra.