Taxi Girl

Taxi Girl èra un grop de pop ròck francés de París (França) eissit del movement new wave e actiu de 1978 a 1986.

An conegut lo succès tre lor dos primièrs 45 torns, dos tròces de synthpop en francés, Mannequin en 1980 e sustot Chercher le garçon en 1981, simple vendut a mai de 150 000 exemplars en França. Chercher le garçon es d'alhor encara a l'ora d'ara la cançon la mai coneguda de Taxi Girl.

Compausat de cinc sòcis al debut en 1978 (Daniel Darc, Mirwais Stass, Laurent Sinclair, Stéphane Erard e Pierre Wolfsohn), Taxi Girl coneis dora un primièr drama ambe la mòrt del bataire Pierre Wolfsohn d'una subredòsi de cocaïna lo 24 de julhet de 1981.

Vengut un trio après la partença de Stéphane Erard e la mòrt de Pierre Wolfsohn, Taxi Girl publica en 1981 son primièr e sol vertadièr album : Seppuku, enregistrat per Andy Scott e produch per Jean-Jacques Burnel dels Stranglers. Jet Black, lo bataire dels Stranglers justament, participa quitament a qualques tròces de Seppuku.

Pr'amor d'una tension creissenta entre Laurent Sinclair e Mirwais Stass, Taxi Girl deven a partir de 1983 un simple duò compausat de Daniel Darc e Mirwais Stass. Publican alavetz lo mini album Quelqu'un comme toi.

A partir de la fin de l'annada 1983, Taxi Girl ralentís son activitat musicala.

Totjorn jos fòrma de duò, tres 45 torns de mai son publicats : Dites-le fort e Paris en 1984, e enfin Aussi belle qu'une balle en 1986. Lo duò se separa pauc après. Daniel Darc, lo cantaire (de son nom vertadièr Daniel Rozoum), comença alavetz una carrièra sòlo onorable, mentre que Mirwais Stass (de son nom vertadièr Mirwais Ahmadzaï) coneis la consecracion en trabalhant per Madonna, mai precisament sus l'album Music de 2000, sus la totalitat de l'album American Life en 2003, e sus qualques títols de Confessions on a Dance Floor en 2005.

• Mannequin (1980)
• Les yeux des amants (1980)
• Chercher le garçon (1981)
• La femme écarlate (1981)
• Les armées de la nuit (1982)
• Quelqu’un comme toi (1983)
• Paris (1984)
• Aussi belle qu'une balle (1986)