Jonny Vang
| Regi | Jens Lien  | ||
|---|---|---|---|
| Produsent(ar) | Dag Alveberg | ||
| Manus | Ståle Stein Berg | ||
| Medverkande | Aksel Hennie, Laila Goody, Marit Andreassen, Bjørn Sundquist, Nils Vogt, Joachim Calmeyer, Fridtjov Såheim, Eivind Sander, Trond Brænne | ||
| Klipp | Pål Gengenbach | ||
| Musikk | Calexico | ||
| Sjeffotograf | Philip Øgaard | ||
| Utgjevingsdato | 2003 | ||
| Lengd | 85 minutt | ||
| Opphavsland | Noreg | ||
| Språk | norsk | ||
| Sjanger | dramakomedie | ||
Jonny Vang er ein norsk film frå 2003. Han er regissert av Jens Lien etter eit manus av Ståle Stein Berg. Musikken var komponert av bandet Calexico. Filmen er ein dramakomedie frå ein liten stad i Gudbrandsdalen,[1] der hovudpersonen Jonny Vang vil ordne opp i livet sitt, på fleire måtar.
Filmen vart rimeleg godt motteken av kritikarane og fekk Amandaprisen for «Beste skodespelar» (Aksel Hennie) i 2003, og han var også nominert til «Beste film». Prisen for «Beste skodespelar» vann filmen også på Brussels European Film Festival, der han i tillegg var nominert til Golden Iris. Filmen vann også «Beste film» på Salemo Shadowline Film Festival i Italia.
Handling
[endre | endre wikiteksten]Jonny Vang (Aksel Hennie) bur på ein liten stad i Gudbrandsdalen. Han prøver å etablere ei verksemd som skal drive med oppdrett av makk, men ambisjonane hans er truga av banksjefen (Trond Brænne), som ikkje vil låne han den nødvendige pengesummen. Han bur med mor si, Brita (Marit Andreassen), og den vanskelege venen hennar, Odvar (Bjørn Sundquist). På toppen av alt dette, har han også eit forhold til Tuva (Laila Goody) – kona til bestevenen hans, Magnus (Fridtjov Såheim). Det vert ikkje betre når ein ukjend person slår han ned med ein spade …
Rolleliste
[endre | endre wikiteksten]| Skodespelar | Rolle |
|---|---|
| Aksel Hennie | Jonny Vang |
| Laila Goody | Tuva |
| Fridtjov Såheim | Magnus |
| Marit Andreassen | Brita |
| Bjørn Sundquist | Odvar |
| Nils Vogt | Politimann |
| Anders Ødegård | Gunnar |
| Silje Salomonsen | Helene |
| Trond Brænne | banksjef |
Produksjon
[endre | endre wikiteksten]Jonny Vang var debuten til Jens Lien som filmregissør.[2] Lien hadde tidlegare etablert seg som reklamefilmregissør.[3] Han hadde også vore representert to gonger på Cannes filmfestival, med kortfilmar.[4] Han skildra filmen som «ein dramakomedie, ei saftig historie, liv, lyst og rock 'n' roll. Det er ein komedie på blodig alvor.»[4]
Lien syntest fyrst at Hennie var for ung for rolla, men skodespelaren gav seg ikkje før han til slutt hadde overtala regissøren om at han var rett mann for rolla.[2] Filmen, som finn stad i Gudbrandsdalen, vart filma på tettstaden Fåvang.[5]
For å få løyve frå Calexico til å bruke musikken deira i filmen, måtte Lien personleg reise til USA. Han tok med seg ein uferdig versjon av filmen, men den einaste staden han kunne få spelt av ein VHS i PAL-formatet, var i ein videobutikk, der om lag 30 kundar såg på saman med bandet og regissøren, som måtte simultanomsetje for dei.[6] Musikken er ei blanding av tradisjonell USA-amerikansk og meksikansk musikk og er henta frå albuma Spoke (1997), The Black Light (1998) og Hot Rail (2000).[1]
Mottaking
[endre | endre wikiteksten]Jonny Vang vart rimeleg godt motteken i den norske pressa. Dagbladet gav filmen fire av seks poeng og skrytte av gode scener, men fann han likevel litt føreseieleg. Filmmeldaren nemnde også musikken til Calexico som noko av det beste ved filmen.[7] Per Haddal i Aftenposten hav han fem av seks poeng og meinte filmen var ein godt fungerande komedie. Haddal nemnde også musikkvalet.[5]
Kritikarane utanfor Noreg var mindre entusiastiske. Bladet Variety skrytte av skodespelarprestasjonane, men syntest filmen mangla «driv og tyngd».[8] Filmmeldaren på den svenske nettstaden «DVD forum» spøkte med at han lo ofte, så han håpa det var ein komedie han såg. Generelt var han nøgd med filmen, men han syntest prestasjonen til Hennie var noko «teatralsk».[9]
Aksel Hennie fekk Amandaprisen for «Beste skodespelar» for innsatsen i filmen i 2003. Filmen var også nominert i kategorien «Beste film», men tapte for Bent Hamer sin Salmer fra kjøkkenet.[10] Hennie vann også prisen for «Beste skodespelar» på Brussels European Film Festival, i tillegg til at filmen vart «Beste film» på Salemo Shadowline Film Festival.[10]
Kjelder
[endre | endre wikiteksten]Referansar
[endre | endre wikiteksten]- ↑ 1,0 1,1 «Jonny Vang» på Filmweb.no (14.02.2003).
- ↑ 2,0 2,1 «En bygdelatino går til filmen» av Sissel Fantoft på Dagbladet.no (23.07.2008).
- ↑ «Brysom type» av Vegard Larsen på Dagbladet.no (15.05.2006).
- ↑ 4,0 4,1 «Debuterer med blod, lyst og rock'n'roll av Lars Ditlev Hansen på Aftenposten.no (03.05.2002).
- ↑ 5,0 5,1 «Heldig om uheldig mann» av Per Haddal på Aftenposten.no (10.02.2003).
- ↑ «Trivia for Jonny Vang (2003)» på IMDb.
- ↑ «Bygderaringen Jonny» av Kurt Hansen på Dagbladet.no (14.02.2003).
- ↑ «Johnny Vang» av David Stratton hjå Variety (18.02.2003).
- ↑ «Jonny Vang» av Thomas Evensson på DVDforum.nu (09.05.2004).
- ↑ 10,0 10,1 «Awards for Jonny Vang (2003)» på IMDb.