Astrid Kumbernuss

Astrid Kumbernuss (fødd 5. februar 1970) er ein tysk tidlegare friidrettsutøvar frå Grevesmühlen som representerte Aust-Tyskland og seinare Tyskland i kulestøyt. Ho vart europameister 1990, verdsmeister 1995, 1997, 1999 og olympisk meister 1996.

Kumbernuss vann gullmedaljen i EM 1990, hennar fyrste store seniormeisterskap, med eit støyt på 20,38 meter. Dei neste åra presterte ho på eit lågare nivå, men var ganske nær ved å forsvare EM-tittelen då ho i Helsinki i 1994 fekk sølv.

Frå 1995 til -99 var Kumbernuss den dominerande kulestøytaren i verda. Ho vann tre VM-gull på rad, 1995, 1997 og 1999 og inn i mellom desse triumfane sikra ho seg kulegullet ved dei olympiske sommarleikane i Atlanta i 1996. Særleg imponerte ho ved VM 1995 i Göteborg, der kula landa på 21,22 meter i hennar livs lengste støyt, og vann med ein margin på 1,18 m til den kinesiske sølvmedaljøren.

Kumbernuss tok si siste medalje då ho ved Sommar-OL 2000 kom på bronseplassen. Ho la opp i 2005.

• EM 1990 i Split: Gullmedalje – 20,38 m, framom Natalja Lisovskaja (20,06 m)
• VM 1993 i Stuttgart: Nr 6 – 19,42 m
• EM 1994 i Helsinki: Sølvmedalje – 19,49 m, bakom Vita Pavlysj (19,61 m)
• VM 1995 i Göteborg: Gullmedalje – 21,22 m, framom Huang Zhihong (20,04 m)
• OL 1996 i Atlanta: Gullmedalje – 20,56 m, framom Sui Xinmei (19,88 m)
• VM 1997 i Aten: Gullmedalje – 20,71 m, framom Vita Pavlysj (20,66 m)
• VM 1999 i Sevilla: Gullmedalje – 19,85 m, framom Nadine Kleinert (19,61 m)
• OL 2000 i Sydney: Bronsemedalje – 19,62 m
• VM 2001 i Edmonton: Nr 6 – 19,25 m
• EM 2002 i München: Nr 4 – 19,22 m
• VM i 2003 i Paris: Utslått i kvalifiseringa (nr 15 – 17,83 m)
• OL 2004 i Aten: Utslått i kvalifiseringa (nr 16 – 17,89 m)