Sými

Sými Lokalt namn Σύμη
Yialos, hamna på Symi sett frå Khorio
Geografi
Stad	Egearhavet
Koordinatar	36°35′56″N 27°50′03″E / 36.59889°N 27.83417°E / 36.59889; 27.83417
Øygruppe	Dodekanesane
Areal	57 km²
Administrasjon
Land	Hellas
Periferi Prefektur	Sør-Egearhavet Dodekanesane
Demografi
Folketal	2 500 (2001)
Folketettleik	44 /km²

Symi (gresk: Σύμη, óg kalla Syme eller Simi, osmansk سومبكى Sömbeki) er ei øy i Hellas som høyrer til Dodekanesane i Egearhavet. Geografisk høyrer derimot ikkje Symi til sjølve øyrekkja i Dodekanesane, men ligg 41 km frå Rhodos. Ho har eit areal på 57 km² og har eit fjellkledd terreng. I indre område finn ein små dalar og langs kysten finn ein både høge klipper og bukter med sandstrender. Hovudbyen ligg på nordaustkysten og vert óg kalla Symi eller Ano Symi. Øya har om lag 2 500 innbyggjarar, som hovudsakleg driv med fiske, handel og turisme.

I tillegg til dei mange historiske stadane på øya er dei mange isolerte sandstrendene, som stundom berre er tilgjengeleg med båt, populære blant turistane. I gresk mytologi var Symi visstnok fødestaden til Kharites og har fått namnet sitt frå nymfen Syme (i antikken vart øya kalla Aigli og Metapontis).

I Illiaden til Homer vert øya nemnd som området til kong Nireus, som kjempa i den trojanske krigen på grekarane si side. Thukydides skriv at under peloponnesarkrigen skjedde slaget ved Syme nær øya i januar 411 fvt. der fleire spartanske skip slo ein skavdron av athenske skip. Ein veit lite om øya fram til 1300-talet, men arkeologiske funn viser at ho var busett heile tida sidan antikken, medan ruinar av festningsverk viser at ho óg var ein viktig stad. Ho var først ein del av Romarriket og så av Austromarriket før ho vart erobra av Maltesarordenen i 1373.

Denne erobringa førte til ein periode på fleire hundreår med velstand for Symi, som med si plassering midt i Dodekanesane vart ein viktig lokalstasjon for handel fram til den dampdrivne skipsfarten kom i gong på 1800-talet. Øya vart erobra av Det osmanske riket i 1522, men fekk halde mange av privilegiane sine og dermed óg velstanden. Symi er kjend for svampane sine som stod for mykje av rikdomen. Ho nådde toppen på midten av 1800-talet og mange neoklassiske herregardar vart bygd i fjellsidene ovanfor hovudbyen.

Symi, i lag med resten av Dodekanesane, har skifta eigarar fleire gonger på 1900-talet. I 1912 vart ho okkupert av Italia, og formelt avstått til Italia i 1923. Ho vart til slutt ein del av Hellas i 1948 (sjå Dodekanesane for detaljar).

I det siste har øya trekt til seg mange turistar og mange av dei neoklassiske heimane har vorte kjøpt opp av utanlandske borgarar.

Næraste flyplass er på Rhodos. Ferje- og/eller snøggbåtrutar mellom anna til Rhodos, Kalymnos, Kos, Leros, Patmos og Pireus (Aten).

Commons har multimedium som gjeld: Sými

• Offisiell side
• symigreece.com