Zopp-Buntgoos

Zopp-Buntgoos
Systematik
Ünnerstamm: Warveldeerten (Vertebrata) Klass: Vagels (Aves) Ornen: Gösevagels (Anseriformes) Familie: Aantenvagels (Anatidae) Ünnerfamilie: Halfgöse (Tadorninae) Tribus: Echte Halfgöse (Tadornini) Geslecht: Buntgöse (Tadorna) Oort: Zopp-Buntgoos
Wetenschoplich Naam
Tadorna cristata
(Kuroda, 1917)

De Zopp-Buntgoos (Tadorna cristata) is en Vagel ut de Familie vun de Aantenvagels. Dor warrt he to de Echten Halfgöse to rekent un dor nu wedder to de Buntgöse. Düsse Aart hett leevt in'n Noordosten vun Asien. Siet 1964 is de Zopp-Buntgoos nich mehr sehn wurrn. Wohrschienlich is se utstorven oder in grote Gefohr, ut to starven.

De Zopp-Buntgoos is 60 bit 63 cm lang un hett en roden Snavel, rode Been un witte Deckfeddern an de Flunken. Suss is de Vagel to'n groten Deel gries. De Goos hett grieswitte „Backen“ un um dat Oge to is se swatt. Beide Geslechter hefft orange Deckfeddern an'n Unnersteert.^{[1] [2]}

Düsse Halfgoos is overhoop man bloß en poor mol sehn wurrn in Russland (Kraj Primorski), Japan (Hokkaido, bloß in dat 19. Johrhunnert) un Süüdkorea. Dat leste Mol, datt se wiss sehn wurrn is, weer 1964 en Poor up en Eiland in'n Süden vun Wladiwostock (Russland). In wat for Rebeeden de Vagel leeft hett, dor is man nich veel over bekannt. He is sehn wurrn in Münnen vun Ströme, man ok (unseker) up Meere in de Barge in Noordoost-China, wo de Vagel unner Umstänn brott oder brott hett.^[3]

De Populatschoon vun de Zoppgoos is 2012 dör BirdLife International up minner as 50 Deerter weltwiet taxeert wurrn. Dat kann angahn, datt de Vagel al utstorven is, man kann ok angahn, datt in Gemarken in de Bargen in Noordoostchina, de wiet af liggen doot, noch Zopp-Buntgöse leven doot. Vundeswegen steiht düsse Aart up de Rode List vun den IUCN unner den Status „akut vun’n Utstarven bedroht“.

• Website Handbook of the Birds of the World

Zopp-Buntgoos. Mehr Biller, Videos oder Audiodateien to’t Thema gifft dat bi Wikimedia Commons.

1. ↑ Handbook of the Birds of the World deel 1, 1992.
2. ↑ [http://www.birdlife.org/datazone/species/factsheet/22680021%7CFactsheet(Tadorna cristata, rutgeven vun BirdLife International, besocht an'n 24. Juni 2015
3. ↑ [http://www.birdlife.org/datazone/species/factsheet/22680021%7CFactsheet(Tadorna cristata, rutgeven vun BirdLife International, besocht an'n 24. Juni 2015