Rolf Wandhoff
Rolf Wandhoff (* 15. September 1917 in Ossenbrügge; † 4. November 1995) weer en düütschen Verwaltungsbeamten. He weer in de CDU.
Leven
[ännern | Bornkood ännern]Wandhoff is 1917 in Ossenbrügge boren un in Freiberg opwussen. Sien Vader weer dor Perfesser an de Bergakademie. Na dat Abitur kemen direkt Arbeidsdeenst un Wehrdeenst. He weer den ganzen Tweten Weltkrieg dör Soldaat. Na de Kriegsfungenschop hett he an de Universitäten Göttingen un Bonn Juristeree studeert. Na en korte Tied as Richter is he 1951 bi dat Binnenministerium von Neddersassen in Hannover anfungen.
1953 is he na de Kommunalopsicht von de Bezirksregerung Ossenbrügge wesselt un hett övergangswies dat Leid över dat Rechtsamt un dat Amt för Kommunalopsicht von’n Landkreis Graafschop Heien övernahmen. 1955 is he in de Staatskanzlie as Referent von Ministerpräsident Hellweeg för Verwaltungsreform, Kommunalrecht un Rundfunkfragen versett worrn. Tosätzlich weer he Ünnerrichtsleiter för Kommunalrecht an de Verwaltungsakademien Nenndörpe un Ossenbrügge för de Inspekter-Anwärters.
1958 hett he sik as Böverkreisdirekter bi’n Landkreis Melle beworven un hett den Posten denn von’n 15. März 1958 bet 30. September 1968 utöövt. Tosätzlich weer he Maat in de Weber-Kummission, de de Kommunalreform in Neddersassen vörbereidt hett.
1968 hett Wandhoff sik in’n Landkreis Gifhorn as Böverkreisdirekter wählen laten, nadem dat aftosehn weer, dat de Landkreis Melle bi de Kreisreform in Neddersassen oplööst warrt. In Gifhorn is he bet 1976 bleven. In siene Amtstied is ok de Heidbrand 1975 fullen, bi de he in siene Funkschoon de böverste Katastrophen-Verantwortliche in sien Kreis weer.
He weer denn von 1976 bet 1981 Regerungspräsident von’n Regerungsbezirk Lümborg un is 1981 in Rohstand gahn. Dat weer 1976 al beslaten Saak, dat de Regerungsbezirke Lümborg un Stood 1978 tohoopleggt warrn schöölt. Wandhoff hett dorüm deelwies ok Opgaven för’n Regerungsbezirk Stood övernahmen.
Nadem Wandhoff in Rohstand weer, hett he wedder in Melle leevt. Dor is he 1995 ok begraven worrn. He weer 52 Johr lang mit siene Fro Lore verheiraadt un harr dree Kinner.
Wandhoff hett ünner annern dat Bundsverdeenstkrüüz I. Klass, den Verdeenstorden von dat Land Neddersassen I. Klass, dat Füürwehr-Ehrenkrüüz 1. un 2. Klass, de Ehrennadel von’n Volksbund Düütsche Kriegsgräverförsorg un den Ehrenteller von’n Kreis Melle un den Kreis Regenwalde kregen.[1]
Warken
[ännern | Bornkood ännern]- Der Grönegau zu Wittekinds Zeiten. Heimatvereen Melle, Melle 1987