Rookgasexplosion
En Rookgasexplosion oder Backdraft (engelsch Fackbegreep) is en explosionsoordig Tünnern vun Rookgasen.
Wenn in en afslaten Ruum en Brand tostannen kummt, verlöscht de bald wedder, vun wegen, dat nich noog Suerstoff för dat Füer dor is. Mitünner gifft dat ok en Twüschentostand, de as Sweelbrand betekent warrt. De Pyrolyys, de dorbi aflöpt, lett Gasen un Dämp entstahn un torüch, de brennbor sünd. Köhlt de Ruum nu langsom af, warrt dat Volumen vun disse Gasen lütter un en Ünnerdruck kummt tostannen. Dat föhrt to den Effekt, dat de Brandrook dör Ritzen as to’n Bispeel ünnen bi Dören utströömt un korte Tiet later wedder torüch in den Brandruum sogen warrt.
Wenn nu de Döör apen maakt warrt, warrt vun wegen den Ünnerdruck Luft mit frischen Suerstoff vun buten in den Ruum insogen, wodör de Gasmischen op’n Slag wedder tünnern kann. Wenn nu noch en Tünnerer dor is, as to’n Bispeel Glootnesten, kann de Gasmischen explosionsoordig hooch gahn mit to’n Deel gresige Naklapp. Bi so en Rookgasexplosion kann sik, wenn de Suerstoff inströömt is, en Flammenwalz mit Snelligkeiten vun bit to 20 m/s un Temperaturen vun 2000 bit 2500 °C utbillen. Bi solk hoge Temperaturen schuult ok de beste Schuulkledaasch ut Nomex nich mehr. De eenfachste Oort sik to schulen is, sik op’n Bodden fallen to laten, vun wegen dat de Temperaturen dor wiet sieter sünd. Dören schüllt ut den Grund jümmer ut’n „Deckung“ rut apen maakt warrn.
Dat Gefährliche an’t Vörstadium vun en Rookgasexplosion is, dat een den Sweelbrand in en Zimmer nich hören un ok anners nich fasttostellen is. Ut den Grund gifft dat in’n Fall vun so en Explosion faken Dode.
De Ünnerdruck, de sik dorbi opboet, dat schienbore Verlöschen vun den Brand un de gresige Explosion sünd düütliche Egenschoppen, de den Backdraft vun’t „normale“ Rookdörtünnern (Rollover) oder den so nöömten Flashover-Effekt ünnerscheedt.
Rookgasexplosionen weern ok de Grundlaag för den Film Backdraft mit Kurt Russell un Robert de Niro ut dat Johr 1991.
De wohrschienlich eerste Rookgasexplosion, de in de Literatur beschreven worrn is, hett sik ruchweg 600 v. Chr. todragen un warrt in dat Book Daniel (Dan 3,22) in de Bibel beschreven.