Prothorax

Bi den Prothorax (vun lat. pro = vör un ooldgr. Thorax för Bostpanzer) hannelt sik dat um dat vörste Segment vun de Bost (Thorax) bi Insekten. Achteran folgt denn de Meso- un de Metathorax. An all düsse Segmente vun den Thorax sitt bi Insekten je een Paar Been an. Bi den Protothorax sünd dat de Vörbeen. Anners, as an de beiden achtern Segmente sitt avers an de Prothorax bi all Insekten, de hüdigendags leven doot, keen Flunken an. Bi de wecken Deerter sünd de Vörbeen sunnerlich utboot, as de Fangbeen bi allerhand Gruppen vun Insekten, de as Rövers leven doot un mit ehre Vörbeen de Büte griept. Düsse Fangbeen sitt an den Prothorax an.