Laadboom

En Laadboom oder Loodboom is en Reedschop an Deck vun en Schipp, wo de Fracht mit in- oder utladen warrt. Stückgootscheepe hefft bit in de 70er Johre vun dat 20. Johrhunnert düsse Laad-Reedschop harrt:

Mitschipps stunn dat grote Deckshuus mit Brugge un Schosteen. Na vörn, in de Midden twuschen Back un dat grote Deckshuus stunnen een oder twee Masten. Na achtern, twuschen dat achterste Deckshuus un dat grote Deckshuus, stunn ok en Mast. Bi all Masten weern unnen an lüttje Deckshüser mit de Elektrik for de Winschen dor in. Un boven up seten sware Platen ut Stahl, de weern tohopenlascht, mit de elektrischen Winschen up. Jeden Mast hett in sien unnern Deel twee Laadböme harrt, de konnen mit Reepe un Blöcke dör de Winschen beweegt weern. So weer dat mööglich, mit en Laadboom vun de Luke bit an de Pier ran to langen oder up de Seesiet bit an dat neegste Schipp. So gung dat, datt en Schipp sülms be- un utladen weern konn.

Scheepe, de wat beter utrüst' ween sund, de hefft ok mol veer Böme an en Mast harrt. Jummers twee vun jem hefft tosamen arbeit' un dat gung so, datt de een sien Positschoon over dat Schipp kregen hett un de annere over de Kaje. De Draht, de an jeden Boom bruukt wurrn is to'n Hissen vun de Ladung, gung over en gemeensomen Kraanhaken. So weer dat nich nödig, de Böme bi dat Laden oder Löschen to bewegen. De Ladung is dör dat Fieren vun den en Draht un dör dat Holen vun den annern vun dat Schipp an Land, oder anners rum swungen wurrn.

To de Laadböme vun en Schipp höörn also: Dröhte (Reepe), Blöcke, Kraanhakens, Winschen (Damp oder elektrisch), Schalter to'n Bedeenen vun de Winschen, Stroppen, Schäkels usw. En Reeg vun Scheepe hefft ok tosätzlich noch Swaarlastböme harrt, wenn dat t.B. um dat Hoochbören vun Lokomotiven gung. Wenn en modern Schipp hüdigendags noch Reedschop to'n Laden oder Löschen an Boord hett, denn so sund dat faken ganze Kraans oder Portalkraans, as bi en poor Containerscheepe oder bi sunnerliche Holtfrachters.