John Major

John Major (* 29. März 1943 in London) is en britisch Politiker. He weer vun 1990 bet 1997 Premierminister vun dat Vereenigte Königriek. He keem in dat Amt, nodem sien Vörgängersche Margaret Thatcher vun den Vörsitt vun de Konservative Partei (de Tories) un as Premierministersche trüchtreden is.

Leven

John Major is toeerst in den Londoner Vöroort Sutton op. Doch denn müss sien Familie no den Konkurs vun sien Vadder (de Zirkusartist ween is) in dat ärmere Veerdel Brixton ümtehn. Mit 16 Johr weer he mit de School fardig. He arbeid dorno as Versekernsvertreder un Goorndwargenmaker (tosamen mit sien Broder Terry Major-Ball). Denn arbeid he för de Standard Chartered Bank. Dor keem he bet in den Verwaltensrat.

John Majors politisch Opstieg füng al mit 21 Johr an. He leet sik 1964 in Brixton as Kandidat vun de Konservative Partei för de Lokalverwalten opstellen. 1968 wörr he denn wählt. Dat weer ok för em en Överraschen, denn Brixton gellt as Hoochborg vun de Labour Party. 1971 verlöör he sien Sitt weer.

1974 kandideer he as Ünnerhuusafordente för den Londoner Wahlkreis St. Pancras, verlöör aver gegen den Labour-Kandidaten. Bi de Wahlen 1979 wörr he denn as Afordente vun den Wahlkreis Huntingdon in dat Ünnerhuus wählt. 1985 kreeg he dat Amt vun en Ünnerstaatssekretär in dat Ministerium för Sozialversekern un een Johr later dat Ministeramt. 1986 wörr he Viez-Finanzminister un 1989 Butenminister vun Grootbritannien. No dree Monaten in dat Amt wörr he Finanzminister.

Nodem Margaret Thatcher parteiintern jümmer mehr kritiseert wörr un denn trüchtreed, wörr John Major to'n Vörsitter vun de Konservative Partei un to'n Premierminister wählt; sien nee Amt treed he an den 27. November 1990 an.

In sien eerste Amtsperiood beleev Grootbritannien en weertschapliche Rezesschoon. De mehrsten politischen Beobachter dachen, dat he bi de Ünnerhuuswahlen 1992 gegen de Labour Party ünner Neil Kinnock verleren wöör. Doch dör sienen volksnohen Wahlkamp künnen sik de Konservativen en knappe Mehrheit sekern.

No de knapp wunnene Wahl wörr de Regeren wegen apen utbrokene Kämp üm de Parteilien jümmer weniger fähig to hanneln. Vör allen de Euroskeptiker weern för den pro-europääsch instellten Major en groot Problem. Nodem de eerste Afstimmen över den Maastrichter Verdrag fehlslaan weer, wiels welke konservative Afordente gegen de egene Parteilien afstimmt hebbt, legg Major för den nesten Dag, den 23. Juni 1993, en twete Afstimmen fast un verknööp de mit en Misstroonsvotum. Major wünn, doch sien Autorität weer swunnen.

De Kritik an sien Regeren nehm jümmer mehr to. 1995 weer Major bang, he künn as Parteibaas afsett warrn. He treed vun dissen Posten trüch, üm sik denn weer wählen to laten. Doch ofschoonst he ene klore Mehrheit kreeg, kunn he sien Autorität nich weer intakt maken. No en poor Nowahlen verlören de Konservativen in den Dezember 1996 de afslute Mehrheit. För den Rest vun de Legislaturperiood weer de Regeren vun Major op de Stimmen vun de noordirischen Unionisten anwiesen.

Bi de Wahlen 1997 wörrn de Konservativen vun de Labour Party slagen un John Major müss an den 2. Mai 1997 dat Amt vun den Premierminister an Tony Blair övergeven. Major behool man sienen Parlamentssitt, weer aver nich mehr faken bi de Sitten in dat Parlament. Anners as siene Vörgängersche Margaret Thatcher nehm John Major keen Adelstitel an, de alle fröheren Premierministers tosproken warrt un kunn so ok keen Sitt in dat Böverhuus kriegen. Vör de Ünnerhuuswahlen 2001 treed John Major as Afordente trüch.

Kiek ok

List vun de Premierministers vun Grootbritannien

Weblenken

Offiziell Biographie vun John Major (engelsch)

Premierministers vun Grootbritannien