Homo rudolfensis

Homo rudolfensis
Systematik
Ornen: Primaten Ünnerornen: Dröögnesenapen Böverfamilie: Ooltweltapen (Catarrhini) Familie: Minschenapen (Hominidae) Tribus: Hominini Geslecht: Homo Oort: Homo rudolfensis
Wetenschoplich Naam
Homo rudolfensis
Alexeev, 1986

Homo rudolfensis is en utstorvene Aart mank dat Geslecht vun de Minschen. Leven dö he vör um un bi 1,9 Mio. Johren. 1972 harr Richard Leakey en Schädel (Seriennummer:KNM-ER 1470) vun düsse Aart bi dat Rudolfmeer in Kenia (hüdigendags: Turkanameer) funnen. Düsse Schädel besteiht ut Hunnerten vun lüttje Knakenstücken.

Wohrschienlich is Homo rudolfensis en Allensfreter (omnivoor) ween. Ofschoonst Homo habilis un Homo rudolfensis deelwiese tohopenleevt hefft, is Homo rudolfensis öller. Man de Homo habilis hett länger leevt. En Reeg vun Forschers ,meent, de Homo rudolfensis weer gor keen egen Aart un de Schädel, wo de Aart ehrn Naam vun hett, weer bloß man en sunnerlichen Fall vun den Homo habilis.

Homo rudolfensis hett in Oost- un in Süüdafrika leevt. De meisten Wetenschopplers denkt, dat Homo habilis use direkte Vörvadder is, man dat gifft ok de wecke, de twiefelt dor an un seht Homo rudolfensis as Vörvadder an.

Bi de Rekonstruktschoon, de Leakey vun den Schädel maakt hett, hett he en platt, minschlich Gesicht wählt. De Inholt vun den Bregen hett bi 700 cm³ legen. So, as he sik dat utdacht hett, maakt de Bregeninholt bi den Homo rudolfensis 56 % vun den Bregen vun den modernen Minschen ut. Dor is he grötter mit, as de Brägen vun den Homo habilis, de bloß bi 47 % vun den modernen Minschen liggen deit.

Bi latere Unnersökungen vun den amerikaanschen Forscher Timothy Bromage sünd de Unnerkeven mehr na vörn sett wurrn. Bromage is dor mit en Computerrekonstruktschoon bi ween. Bi em weer de Inholt vun den Brägen bloß bi 500 cm³ groot un de Schädel hett mehr utsehn, as bi en Apen.^[1]

1. ↑ Volkskrant, Oermens aapachtiger dan gedacht, 27. März 2007

Homo rudolfensis. Mehr Biller, Videos oder Audiodateien to’t Thema gifft dat bi Wikimedia Commons.