Heinrich Vogt (Astronom)

Heinrich Vogt, (* 5. Oktober 1890 in Gau-Algesheim, Rhienland-Palz; † 23. Januar 1968 in Heidelbarg) weer en düütschen Astronom.

Vogt weer dat jüngste Kind vun den Buern Philipp Vogt un den sien Fro Margaretha. Verheiraat weer Vogt mit Margret Vogt, borene Braun. Se harrn en Dochter un en Söhn.

Na sien Abitur 1991 an’t Herbstgymnasium (Kronbarger Hoff) in Mainz hett Vogt an de Universität Heidelbarg bi Max Wolf en Studium vun de Astronomie, Mathematik un Physik anfungen. Vun 1912 an, weer he Helpsmann vun Wolf. Sien Loopbahn in de Wetenschop hett he 1919 mit den Dokter to dat Thema „Zur Theorie der Algolveränderlichen“ un 1921 mit de Habilitatschoon to dat Thema „Photometrische Untersuchungen und Helligkeitsbestimmungen in dem Sternenhaufen h und χ Persei“ wieterföhrt. 1926 is he buterordig Professer in Heidelbarg worrn un weer gliektietig Beobachter an de Landssteernwacht Heidelbarg-Königstuhl.

1929 weer Vogt as Ordinarius an de Friedrich-Schiller-Universität Jena beropen un weer togliek vun 1929 bit 1933 Direkter vun de Universitäts-Steernwacht Jena. 1931 is he Liddmaat vun de NSDAP worrn un weer dorna politischen Leider un Vertroensmann vun de NSDAP-Kreisleitung an de Universität^[1]. 1933 is he Liddmaat vun de SA worrn, in de he bit to’n Böverstormföhrer opsteeg^[1]. Vogt weer 1933 as Ordinarius torüch an de Universität Heidelbarg beropen, woneem he Nafolger vun Max Wolf worrn is, de 1932 doodbleven weer.

Bit 1945 weer Vogt Direkter vun de Landssteernwacht Heidelbarg-Königstuhl. Dorna weer he vun dat Amt afsett, hett aver bit to sien Emeriteren 1957 de Professur behollen. In sien Vörlesen hett he en grötteren Hörerkreis ansnackt, schreev populärwetenschoppliche Monografien as „Die Spiralnebel“ (1946), „Der Bau des Weltalls“ (1949) oder „Kosmos und Gott“ (1951) un hett sik denn ok mit kosmologische un naturphilosoophsche Fragen befaat, de he in sien letzten Böker „Außergalaktische Sternsysteme und die Struktur der Welt im Großen“ (1960), „Die Struktur des Kosmos als Ganzes“ (1961) un „Das Sein in der Sicht des Naturforschers“ (1964) besnackt hett.

1943 is Vogt Liddmaat vun de Leoplodina worrn. He weer bito Maat vun de Heidelbarger Akademie vun de Wetenschoppen. An’n 9. Dezember 1912 hett he den Asteroid (735) Marghanna opdeckt, na em sülvst is de Asteroid (1439) Vogtia nöömt. Na Vogt ist ok de Vogtsche Eendüüdigkeitssatz (ok: Vogt-Russell-Theorem) nöömt.

• Aufbau und Entwicklung der Sterne. Leipzig: Becker & Erler, 1943, 2. Opl. Leipzig: Geest und Portig, 1957.

• Publikatschonen vun H. Vogt in’t Astrophysics Data System
• A. Bohrmann: Heinrich Vogt. Mitteilungen der Astronomischen Gesellschaft, Bd. 24 (1968), S. 7 (Naroop)
• E. Kollnig-Schattschneider: Heinrich Vogt, 5.10.1890-23.1.1968. Astronomische Nachrichten, Bd. 292 (1970), S. 45. (Naroop)
• Norbert Diehl: Biografie vun Heinrich Vogt, afropen an’n 21. April 2009

1. ↑ ^{a b} Ernst Klee: Das Personenlexikon zum Dritten Reich. Wer war was vor und nach 1945. Fischer Taschenbuch Verlag, 2. aktualiseerte Oplaag, Frankfort an’n Main 2005, ISBN 978-3-596-16048-8, S. 643.