Hans Koschnick

Hans Koschnick (* 2. April 1929 in Bremen; † 21. April 2016 ok dor) weer en düütschen Politiker vun de SPD un ehmaligen Bremer Börgermeester. Vun 1987 bit 1994 höör he to den düütschen Bundsdag to.

Koschnick sien Vadder is an’n 1. Mai 1933 achter Trallen sett wurrn, weil he bi de kommunistisch Gewerkschaft RGO mitmaakt hett. He harr dat Drepen to’n 1. Mai organiseert un en Reed holen. Dorüm hefft se em veroordeelt vunwegen Hoochverrat. He möß in’n Knast, in’t Tuchthuus un in dat KZ Sachsenhausen. Eerst Enn 1938 is he wedder freekamen. 1943 hefft se em intagen to’n Kriegsdeenst ünner Beding. 1944 is he ümkamen in Finnland. Ok siene Mudder hett een Jahr in’t Lock seten, weil se mank verscheden Gruppen vun den Wedderstand Nahrichten hen un herbröcht harr. Faken hett se ehr Arbeitsstell verlaren vunwegen se bi de Düütsche Arbeitsfront (DAF) nich mitmaken woll un ok nich Heil Hitler seggen woll. Bi en Schausteller hett se amenn Slickersaken un Bontjen verköfft. Düt allens bedüde, dat Koschnick siene Öllern de meiste Tiet nich tohuse weern, un dat he un siene Sustern un Bröder bi de Grootöllern upwussen sünd.

Nah de Middelschool hett Koschnick sik vun Januar 1945 af an utbillen laten to’n bövern Deenst in de Verwaltung. In’n März möß he noch to’n Arbeitsdeenst vun’t Riek (RAD) un to de Suldaten. De Briten hefft em fungen un nah Brüssel bröcht. Vun dor is he denn in’n September 1945 wedder nah Bremen kamen.

Koschnick is in Bremen Baas vun de Afdelen Jöögd, Familie, Sport bi den Senator för Soziale Saken wurrn. 1950 is he in de SPD inträden. Vun 1955 af an weer he in de Bremer Börgerschup. Vun 1951 bit 1954 weer he Bezirkssekretär vun de Gewerkschaft ÖTV un vun 1963 af an hett he bi’n Binnensenator arbeit. An’n 28. November 1967 is he an Willy Dehnkamp siene Stäe träden un Präsident vun den Senat un Börgermeester vun Bremen wurrn. Dormit weer he de Baas vun de Regeren in düt Bundsland. Dat is he meist 18 Jahre lang bleben, bit up’n 18. September 1985, as Klaus Wedemeier em up düssen Posten folgt is.

Vun 1970 bit 1991 weer Koschnick in den Vörstand vun de SPD in Düütschland mit bi. Vun 1975 bit 1979 weer he twete Vörsitter vun de SPD in Düütschland un de Partei ehr twete Mann achter Willy Brandt. Vun 1970 bit 1971 un denn nochmal vun 1981 bit 1982 weer he Präsident vun den Bundsraat in Düütschland. Vun 1987 bit 1994 hett he in’n düütschen Bundsdag seten un weer twete Vörsitter vun den Utschuss för Butenlandsche Saken.

Vun’n 23. Juli 1994 bit to’n 2. April 1996 weer Koschnick as Beupdragten vun de Europääsche Union in Mostar in Bosnien-Herzegowina. He harr de Upgaav, en Oog up dat Wedderupboon vun de Stadt to smieten. An’n 11. September 1994 is en Anslag up Koschnick ünnernahmen wurrn, dorbi is sien Kontor in Dutt gahn, man he süms hett keen Schaden nahmen. An’n 7. Februar 1996 hett dat enen tweten Anslag geben, man ok dor is nix vun wurrn. An’n 26. Februar 1996 hett Koschnick vör den Raat vun de Butenministers vun de Europääsche Union Bott geben.

Koschnick weer verheiraat un harr enen Söhn. 2016 is he in’t Öller vun 87 Johren doodbleven.

• Bremer Senat
• Senat Koschnick I
• Senat Koschnick II
• Senat Koschnick III
• Senat Koschnick IV
• Senat Koschnick V

Börgermeesters vun de Free Hansestadt Bremen na den Tweeten Weltkrieg

Erich Vagts | Wilhelm Kaisen | Willy Dehnkamp | Hans Koschnick | Klaus Wedemeier | Henning Scherf | Jens Böhrnsen | Carsten Sieling | Andreas Bovenschulte