Hutloh

Hutloh is en Eddelgood von de Familie Marschalck von Bachtenbrock in Heckthusen.

Dat Good liggt op’n Geestrand in de Neegd von de Oost.

De Öörd ümto sünd Heckthusen in’n Noorden, Host in’n Oosten, Burweg in’n Süüdoosten, Blomendol in’n Süden, Kronenborg un Klint in’n Süüdwesten un Koppel in’n Westen.

Hutloh is siet 1555 in Besitt von de Familie Marschalck.^[1]

De Goodsbesitter Jürgen von Marschalck is ahn Söhns doodbleven. Dat Good is denn in Besitt von sien Swiegersöhn Levin von Marschalck gahn, de üm 1614 rüm sien Dochter Jutta von Marschalck freet harr. In’n Dörtigjohrigen Krieg hett Levin sik gegen sien Landsherrn, den Bremer Arzbischop Johann Friedrich stellt un to König Christian IV. von Däänmark un Noorwegen hollen. Dorüm is för en Tied ok dat Good Hutloh von’n Arzbischop kunfiszeert worrn. Levin kunn dat Good aver wedder trüggwinnen.

De Hutloher Twieg von de Familie Marschalck von Bachtenbrock hett 1711 den Freeherrnstand kregen.

1945 hett in’n Tweten Weltkrieg en Flegergranaat dat Good drapen.^[1] Later is dat aver wedder instand sett worrn.^[1]

Dat Good Hutloh weer fröher 180 Hektar groot.^[1] 1866 hett de Familie Marschalck anfungen, dat Land von de verscheden Göder in de Ümgegend tohooptoleggen.^[1] De Stammseet von de Familie is denn dat Good Hutloh worrn, dat nu 716 Hektar Land harr, wat to en groten Deel Holt weer.^[1] Vondaag hett dat Good en Grött von 780 Hektar.^[1]

Dat Good hett vör 1850 to dat Gericht Heckthusen höört. 1850 is dat denn Deel von dat Amt Himmelpoorten worrn, dor aver man twee Johr bleven un is 1852 an dat Amt Oosten kamen. 1885 is dat Amt Oosten in’n Kreis Neehuus opgahn. 1932 is de Oort an’n Kreis Land Hadeln kamen un 1977 Deel von’n Landkreis Cuxhoben worrn.

In de öllste Tied hett dat Good to Heckthusen tellt, is in dat 19. Johrhunnert aver an de Gemeen Klint kamen. An’n 1. Juli 1972 mit de Gemeenreform in Neddersassen is Klint denn Deel von de Gemeen Heckthusen worrn.

• Jürgen von Marschalck
• Levin von Marschalck
• Jürgen von Marschalck
• Carl Gustav von Marschalck
• George von Marschalck
• Gustav Wilhelm von Marschalck (22. Dezember 1841-)
• –1954: Max Freiherr Marschalck von Bachtenbrock
• 1954–1970: Jürgen Freiherr Marschalck von Bachtenbrock
• 1970–: Hubertus Freiherr Marschalck von Bachtenbrock
• Clemens Freiherr Marschalck von Bachtenbrock

Hutloh is evangeelsch-luthersch präägt un höört to dat Kaspel von de Marienkark in Heckthusen.

För de Kathoolschen is de St.-Nikolaus-Kapell in Heckthusen tostännig, de siet 1. September 2010 to de Karkengemeen Hillig Geist in Stood tohöört.

1. ↑ ^{a b c d e f g} Hutloh op gemeinde-hechthausen.de
2. ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 119
3. ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 312
4. ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 150
5. ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 148

De Artikel „Hutloh“ is een exklusiven Artikel up de Plattdüütsche Wikiepdia. In anner Spraakuutgaven is de nich to finnen.

Koordinaten:53° 38′ N, 9° 14′ O