Lee (Landkreis Cuxhoben)

Wapen/Flagg	Koort
Basisdaten
Bundsland: Neddersassen Landkreis: Cuxhoben Samtgemeen: Land Hadeln
Flach:	21,29 km²
Inwahners:	1004 (31. Dezember 2023)
Hööchd:	1 m över de See
Postleettall:	21765
Vörwahl:	04758
Geograafsche Laag:	Koordinaten:53° 46′ N, 8° 50′ O53° 46′ N, 8° 50′ O
Grenzen bi OSM:	1180040
Gemeenslötel:	03 3 52 041
Öörd in de Gemeen:	1
Börgermeester:	Eugen Böhm
Websteed:	www.nordleda.de
Koort Kreis

De Lee (hoochdüütsch Nordleda) is en Dörp un Gemeen in de Samtgemeen Land Hadeln in’n Landkreis Cuxhoben, Neddersassen mit 1004 Inwahners (Stand 31. Dezember 2023). To de Gemeen höört blangen de Lee ok de lüttjeren Öörd Heernskoop, Kampen un Fresenhöörn. De Lee sülvs warrt indeelt in Westerenn, Middeldeel, Oosterenn un Böverwettern.

De Lee liggt in de Masch von de Elv so bi söss Kilometer af von’n Stroom. Dör den Oort dör löppt de Wilster. In’n Süüdwesten von de Lee liggt dat Naturschuulrebeed Aßbütteler Moor.

De Naveröörd sünd dat Oosterenn von de Worth in’n Noorden, Süderwisch in’n Noordoosten, Neenkarken in’n Oosten, Helmworth-Wetternweg in’n Süüdoosten, Oosterwannen un Westerwannen in’n Süden, Füürsteed in’n Süüdwesten, Köstersweg in’n Westen un dat Süderenn von de Worth in’n Noordwesten.

De Navergemenen sünd Neenkarken in’n Oosten, Helmworth in’n Süüdoosten, Wannen in’n Süden un Cuxhoben in’n Noordwesten.

In de Oorkunnen kummt de Lee toeerst 1312 vör. Dat hett jümmer to Land Hadeln tohöört un von 1852 bet 1885 to dat Amt Oterndörp. 1885 is dat Deel von’n Kreis Hadeln worrn un hett na 1932 to’n Landkreis Land Hadeln tohöört. 1977 is de Landkreis Land Hadeln denn Deel von’n Landkreis Cuxhoben worrn.

Bi de Wiehnachtsflood 1717 sünd veel Lüüd un veel Veh in de Lee verdrunken.

De Lee is evangeelsch-luthersch präägt un billt mit de Nicolai-Kark en egen Kaspel.

För de Kathoolschen is de Hillig-Krüüz-Kark in Oterndörp tostännig.

De Lee hett en egen Karkhoff, de in de Neegd von de Kark liggt.

Dat Wapen von de Lee wiest baven op roden Grund en sülvern Spoorn un dree sülvern Steerns. In’n Schildfoot wiest dat op grönen Grund en sülvern Wellenbalken.

De Wellenlien steiht för den Beek Lee un de Deel baven is ut dat Wapen von de Familie Lapp, de dat Patronaat över de Nicolai-Kark harrn. Dat Wapen hett de Gemeen 1938 beslaten.

Liddmaten

• 2011:

  CDU: Eugen Böhm, Ingo Graf, Uwe Blohm, Florian Kramer, Hans-Hermann Ropers, Harry Vorthmann

  SPD: Uwe Haase, Heike Niemann, Marianne Täuber, Bärbel Weihe

  Gröne: Siegfried Anskeit

• 2016:

  CDU: Uwe Blohm, Eugen Böhm, Ingo Graf, Florian Kramer, Hans-Hermann Ropers, Ingo Rötting, Harry Vorthmann

  SPD: Uwe Haase, Heike Niemann, Marianne Täuber

  Gröne: Ralf Hische

De Schützenvereen Lee is an’n 9. Mai 1953 grünnt worrn.

De Oort hett en Freewillige Füürwehr, de an’n 26. März 1929 grünnt worrn is.

In’n Noorden von de Lee liggt en Windpark mit 43 Windrääd.

De Lee liggt an de Landsstraat 118, de in’n Noordoosten över Neenkarken bi Oterndörp an de Bundsstraat 73 ran löppt un in’n Süüdwesten över Wannen un Krümpel na Niewohl. Von de L 118 af na Noordwesten geiht de Kreisstraat 10, de na de Worth geiht. Annere Straten gifft dat ans nich.

De nächste Opfohrt op en Autobahn is de Opfohrt 3 Noordholt von de A 27 (Afsnidd Cuxhoben–Bremerhoben), de so bi 14 Kilometer weg is.

De nächste Bahnhoff is de Bahnhoff Oterndörp an de Nedderelvbahn, de so bi acht Kilometer weg is.

In de Bremerhobener Straat hett de Volksbank Stood-Cuxhoben en Filiaal.

Bet 1994 is dat Afwater in Huuskläranlagen klärt worrn. In dat Johr is de Lee to Kösten von üm un bi 5 Milljonen Mark an dat Klärwark Oterndörp anslaten worrn. Nadem dat Klärwark Oterndörp 2003 dichtmaakt hett, warrt dat Afwater von Oterndörp ut dör en Druckröhr na dat Klärwark Cuxhoben pumpt.

De Schriever Heinrich Rüther is 1866 in de Lee boren. 1924 is de Theoloog Werner Schröder hier boren un 1948 de Politiker Uwe Biester. De Schriever Samuel Christian Pape is 1817 in de Lee doodbleven. Sien Dochter, de Schrieversche Maria von Hadeln, is 1814 in de Lee boren.

De Schrieversche Elisabeth Rühmkorf weer von 1921 bet 1925 an de Volksschool in de Lee Schoolmeester.

• Chronik der Gemeinde Nordleda. Sonnerdruck von de Volksbank Cuxhoben-Hadeln, Lee 1995

1. ↑ C. H. Jansen: Statistisches Handbuch des Königreichs Hannover. 1824, Sied 448: http://books.google.de/books?id=tG0AAAAAcAAJ&pg=PA448
2. ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 156: http://books.google.de/books?id=eOI-AAAAcAAJ&pg=PA156
3. ↑ Franz Heinrich Ungewitter: Neueste Erdbeschreibung und Staatenkunde. 1858, Sied 422: http://books.google.de/books?id=ZkoNAQAAIAAJ&pg=PA422
4. ↑ http://www.gemeindeverzeichnis.de/gem1900/gem1900.htm?hannover/hadeln.htm
5. ↑ ^{a b c} http://www.verwaltungsgeschichte.de/hadeln.html

Lee. Mehr Biller, Videos oder Audiodateien to’t Thema gifft dat bi Wikimedia Commons.

• Websteed von de Gemeen (plattdüütsch, hoochdüütsch)

Städer un Gemenen in den Landkreis Cuxhoben

Armsdörp | Belen | Bevers | Bülkau | Cuxhoben | Geestland | Godshem | Hagen | Heckthusen | Helmworth | Hemmoor | Hollnseth | Kumbarg | Lee | Loomst | Lox | Mittelsnohn | Neehuus | Neenkarken | Öberndörp | Oosten | Oosterbrook | Oterndörp | Schippdörp | Steenau | Stinst | Wannen | Wingst | Wuster Noordseeküst