Franz Cornelsen (Politiker)

Heinrich Friedrich Franz Cornelsen (* 2. Oktober 1868 in Stood; † 14. Oktober 1951 ok dor) weer en düütschen Regerungsbeamten un Afornten.

Cornelsen is 1868 as Söhn von Sophie Elisabeth, borene Steffens, un den Wienhändler Johann Cornelsen (22. Oktober 1831–21. Juli 1892) in Stood boren un hett 1888 an de Kloosterschool in Ilfeld dat Abitur maakt. He weer för een Johr as Freewilligen Oberleutnant bi dat Sleswigsche Feldartillerie-Regiment Nr. 9. Na disse Tied hett Cornelsen Rechtswetenschoppen an de Universität Freiburg un de Universität Berlin studeert. 1893 hett he de Prüfung as Gerichtsreferendar maakt un 1895 in Leipzig den Dokter iur. utr. kregen. 1899 hett he de Prüfung as Regerungs-Assesser maakt. Von 1893 bet 1905 hett he an verscheden Gerichten un Behörden in Prüßen arbeidt. An’n 22. Dezember 1905 hett he den Opdrag kregen, dat Landraadsamt in’n Kreis Minnen to verwalten. An’n 7. August 1906 hett de Kreisdag in Minnen denn beden Cornelsen to’n Landraad to maken, wat he denn an’n 28. September 1906 worrn is.

In’n Eersten Weltkrieg müss Cornelsen von 1914 bet to’n 1. März 1917 na’n Kommiss. An’n 26. September 1917 hett he den Opdrag kregen, dat Landraadsamt in’n Kreis Stood to verwalten. De Kreisdag hett denn an’n 3. März 1918 beden Cornelsen to’n Landraad to maken.

Cornelsen is bet 1932 in Stood bleven, as de Kreis Stood mit’n Kreis Jörk un Kreis Keden to’n ne’en Landkreis Stood tohoopslaten worrn is. Cornelsen is dor denn in’n Rohstand gahn. He weer Maat von’n Konservativen Vereen in Minnen un Afornten in’n Provinziallanddag von de Provinz Westfalen.

Cornelsen weer evangeelsch un mit Emily Cornelsen, borene Gädeke, verheiraadt. Sien Söhn Franz Cornelsen (* 1908, † 1989) weer Verlegger un Grünner von’n Cornelsen-Verlag.

• Landwehrdeenstpries II. Klass un Iesern Krüüz I. un II. Klass.