Flagg vun Surinam

De Flagg vun Surinam wurr an' 25. November 1975 inführt.

De Natschonalflagg besteiht ut fiev horizontaal Striepen. Vun baben nah ünnern: gröön (düppelt Breedt), witt, root (veerfack Breedt), witt, gröön (düppelt Breedt). In't Zentrum vun de Flagg is en geel, fievzackig Steern dorgestellt. Root symboliseert den Fortschritt un den Kamp för en beter Leven. Witt is dat Symbol för Freeheit un Recht. De Farv gröön steiht för de Fruchtborkeit vun dat Land un de Steern symboliseert de golden Tokunft.

Nahdem in' Dezember 1954 dat Statut för mehr Unafhängigkeit vun Surinam binnerhalv vun dat Königriek vun de Nedderlannen in Kraft treden weer, entstunn de Wunsch nah eegen natschonalen Symbolen. Premierminister Emanuels hett denn 1958 den Updrag to'n Entwurf vun en eegen Flagg in Updrag geven. Letztlich hett sück de Idee un de Entwurf vun Noni Lichtveld, de Farven vun de fiev verscheeden Bevölkerungsgruppen in Form vun Steerns dortostellen un dör en Ellipse to verbinnen, dörsett. De Farv swaart stell de Grupp vun de afrikaansch, bruun de Gruppen hindustaansch un javaansch, geel chineesch, root inheimisch un witt europääsch Herkunft dor. De witt Achtergrund sull dat freedliche Tosommenleven vun de Bevölkerungsgruppen symboliseeren. An' 8. Dezember 1959 wurr disse Entwurf dör dat Parlament annommen un an 15. Dezember, den Königrieksdag tosommen mit de Natschonalhymne „God zij met ons Suriname“ apenlich inführt.

• Smith/Neubecker: Wappen und Flaggen aller Nationen. München 1980, ISBN 3-87045-183-1.

Flaggen Surinames. Mehr Biller, Videos oder Audiodateien to’t Thema gifft dat bi Wikimedia Commons.

• Flags of the World - Surinames (engelsch)