Annaba

Annaba, araabsch:عنابة, op franzöösch fröher Bône, is een Stadt in Algerien an de Waterkant vun de Middellannsche See, ganz buten in´n Noordoosten vun dat Land. In dat Johr 2005 weern dor üm un bi 385000 Minschen tohuus. De Stadt is Hööftstadt vun de Provinz Annaba. De liggt an de Grenz na Tunesien. In dat Johr 2004 weern üm un bi 40.000 Studenten an de Universität inschreven. In de Stadt gifft dat ok een internatschonalen Lufthoben.

De Stadt is vun de Phöniziers ut Tyros ünner den Naam Hippo grünnt warrn. Later hebbt de Königen vun dat Volk vun de Numider dor jümehr Residenz hatt. Dörüm kreeg de Stadt den tweeten Naam Regius. 46. v. Chr. sünd de Römers kamen un hebbt de Stadt innahmen. De Stadt kreeg dat Ansehen vun een Kolonie.

Vun 395 - 430 weer de hillige Augustinus Bischop vun Hippo. He weer just sturven, as de Wandalen de Stadt innehmen döen. Se harrn 18 Maanden vör de Muern legen. Bet dat denn sowiet weer un de Wandalen de Stadt Karthago innahmen harrn, weer eerstmal Hippo jemehr Hööftstadt.

534 hebbt de Byzantiners de Stadt innahmen un 698 kemen denn de Arabers. Nich wiet weg vun dat ole Zentrum ut de Antike, hefft de Arabers in dat 11. Johrhunnert de nee Stadt Beleb-El-Anab grünnt. Dor is denn bit op düssen Dag de Stadt Annaba vun wurrn. In dat ole Zentrum sünd allerhand ole Boowarken utgraven wurrn. Ok een Basilika ut de fröhe Christentiet hebbt franzöösche Archäologen utbuddelt. Dat warrt seggt, düsse Basilika is woll de Karken, wonehm Augustinus as Bischop in predigt hett.