Amtsgericht Leh

Dat Amtsgericht Leh weer en Amtsgericht in dat Königriek Hannover un in de prüüßsche Provinz Hannover. Dat harr sien Seet in de Noordstraat 10 in Leh.

Dat Amtsgericht Leh weer dat Obergericht Leh, von 1859 af an dat Obergericht Veern un von 1879 af an dat Landgericht Veern överornt.

Mit dat hannöversche Gerichtsverfatensgesett von’n 8. November 1850, dat an’n 1. Oktober 1852 in Kraft gahn is, sünd Verwaltung un Justiz kumplett trennt worrn un de Amtsgerichten sünd as ünnerst Gerichten inricht worrn. Dat Amtsgericht Leh is dor denn blangen dat Amt Leh nee schapen worrn. De Grenzen von Amt un Amtsgerichtsbezirk weren desülven.

1859 is dat Amtsgericht Beverst oplööst worrn. En Deel von’n Bezirk von dit Amtsgericht mit de Kaspels Lox, Bexhöv, Oolluunbarg un Beverst un de Gemeen Apeler is denn Deel von’n Bezirk von dat Amtsgericht Leh worrn. Dat Amtsgericht Beers is 1859 ok oplööst worrn un kumplett Deel von’n Amtsgerichtsbezirk Leh worrn.

1864 is de Bezirk von dat Gericht opdeelt worrn. Een Deel is bi dat Amtsgericht Leh bleven, de annere hett den Bezirk von dat ne’e Amtsgericht Geestmünn billt. Nadem 1867 dat Königriek Hannover von Prüßen annekteert worrn is, weer dat en königlich-prüüßsch Amtsgericht.

An’n 9. Oktober 1942 is dat Amtsgericht Leh mit de Amtsgerichten Geestmünn un Bremerhoben to dat ne’e Amtsgericht Wersermünn tohoopfaat worrn, dat denn ünner dat Landgericht Veern stünn. 1947 hebbt de Briten dat Amtsgericht Wersermünn ünner dat Landgericht Bremen stellt un in Amtsgericht Bremerhoben ümdöfft.

Dat Gerichtsgebüüd is twüschen 1913 un 1916 von dat Königlich-Prüüßsche Hoogboamt Leh ünner’n Regerungsbomeester Wilhelm Trautwein boot worrn. Dat Gebüüd ut Backsteen hett dree Etaaschen un dree Flögels un is in’n Stil von dat Neobarock hollen.

• 1852–1859: Caspar Friedrich William von Schulte
• 1859–1861: Wilhelm Bernhard Conring
• 1861–1873: Heinrich August Ulex
• 1873–1875: Leopold von Hassell
• 1876–1877: Gerichtsassesser August Philipp Franz Thöl
• 1878–1906: Johannes Rodewyk
• 1907–1926: Felix Oppenheim
• 1926–1932: Georg Bethe
• 1933–1942: Bernhard Behrens

• List von de Amtsgerichten in dat Königriek Hannover

Amtsgerichten in’n Obergerichtsbezirk Leh (1852–1859)

Beers | Beverst | Dorum | Hagen | Leh | Oterndörp

 

Amtsgerichten in’n Obergerichtsbezirk Veern (1852–1879)

Achem | Blomendal | Dorum (siet 1859) | Hagen (siet 1859) | Leendaal | Leessem (bet 1859) | Leh (siet 1859) | Oosterholt | Otterbarg (bet 1859) | Rodenborg | Snevern (bet 1859) | Veern | Zeven (bet 1859)

 

Koordinaten:53° 34′ N, 8° 35′ O