Noordkoreaansch Won

Mit den Noordkoreaanschen Won (koreaansch 조선민주주의인민공화국 원) warrt in Noordkorea betahlt. He is ünnerdeelt in 100 Chŏn. He warrt vun de Zentralbank vun Noordkorea utgeven.

Dat gifft Münten to 1, 5, 10 un 50 Chŏn un to 1, 10, 50 un 100 Won un Schiens to 1, 5, 10, 50, 100, 200, 500, 1000 un 5000 Won.

De Won is an’n 6. Dezember 1947 inföhrt worrn un hett den Koreaanschen Yen aflööst. 1959 is de Won afweert worrn un 100 Won sünd in een ne’en Won tuuscht worrn. De Won weer för Börgers vun Noordkorea. Lüüd ut dat Utland müssen mit Wesselzertifikate betahlen. Dat geev twee Utgaven, een in rood för Lüüd ut de sozialistischen Länner un een in blau för Lüüd ut kapitalistsche Länner. Bi Münten vun vör 1980 harrn de normalen keen Steern, de för sozialistische Besökers weren mit een Steern kenntekent un de för kapitalistsche Besökers weren mit twee Steerns kenntekent. Siet Juli 2002 warrt disse Zertifikate aver nich mehr bruukt un Lüüd ut dat Utland betahlt mit Devisen.

Bet 2001 weer de Wesselraat vun’n Won op 2,16 Won för een US-Dollar fastleggt.

De Münten to 1, 5, 10 un 50 Chon un to 1 Won warrt nu kuum noch bruukt. Bruukt warrt blot noch de Münten to 10, 50 un 100 Won veel. De Münten weren ut Aluminium maakt.

1988 hett de Hannelsbank twee Serien vun Hannelszertifikate utgeven. De Weert weer 1, 5, 10, 50 Chŏn, 1, 5, 10 un 50 Won. De Serie för kapitalistsche Besökers weer blau-gröön, de för sozialistische Besökers pink. De Chŏn-Schiens harrn en eenfach Design vun en Munster un den Weert, de sozialistischen hebbt de Internatschonale Fründschops-Utstellung wiest un de kapitalistschen de Chollima-Statue.