Mexikoaant

Mexikoaant(e)
Systematik
Ünnerstamm: Warveldeerten (Vertebrata) Klass: Vagels (Aves) Ornen: Gösevagels (Anseriformes) Familie: Aantenvagels (Anatidae) Ünnerfamilie: Echte Aanten (Anatinae) Tribus: Swemmaanten Geslecht: Aanten an sik Oort: Mexikoaante (Anas diazi)
Wetenschoplich Naam
Anas diazi
Ridgway, 1886

De Mexikoaant(e) (Anas diazi) höört to de Familie vun de Aantenvagels, un dor to de Aanten an sik. Tohuse is se in den Süden vun de USA un in Mexiko, as de Naam al seggt.

De Mexikoaante is en grote Grünnelaante. Se warrt 51 bit 56 cm lang. Mit ehr Fedderkleed sleiht se na dat Seken vun de Graue Aant, man se is an't Lief en beten wat dunkerer un in't Gesicht wat heller. Man de Kontrast is nich so dull, as bi de Amerikaansche Swatte Aaante. Ok de Floridaaante sleiht na de Mexikoaant, man all dree kaamt nich in desülvigen Gemarken vör. Anners, as de Graue Aante,hett de Mexikoaant en grönen Flunkenspegel mit en smallen witten Band an't Enne. An de Steertfeddern sitt avers gor keen Witt an. So kann se mit de Graue Aante ut'neen holen weern. Waart un Aante verscheelt sik nich groot un ok over't Johr hen ännert sik bi Heken un Seken dat Fedderkleed nich. An un for sik gifft dat bi de Mexikoaante avers en ganzen Barg Varianten in de Farv. Sunnerlich kaamt ok veel Hybriden mit de Graue Aante vör.^[1]

Fröher is de Mexikoaante vun'n Süden vun de USA bit na Zentralmexiko hen vörkamen. Hüdigendags leevt se dor bloß noch to'n Deel, vunwegen, datt sik de Umwelt bannig ännert hett. Bröden deit se in de Gemarken vun den Rio Grande in Mexiko un in Texas, un in de Gemarken rund um den Gila River in'n Süüdwesten vun New Mexiko un in en lüttjet Rebeet an de Grenz twuschen Arizona un Mexiko. In Mexiko brott de Aante sunnerlich in de Bundsstaten Chihuahua, Durango, Jalisco un México. De Mexikoaante treckt normolerwiese in'n Winter nich weg, man blifft, wo se is. Man langs den Rio Grande liggt de Saak unner Umstänn anners.

De Mexikoaante sütt meist so ut, as de Graue Aante un warrt vundeswegen hen un wenn as en Unneraard vun de Graue Aante ankeken. Faken krüüzt se sik ok mit de Graue Aant un mit de Floridaante. Man bi Analysen vun de DNA is in de lesten Johre rutsuert, datt sik dat bi de Mexikoaante um en tämlich junge, man egenstännige Aart hanneln deit^[2] Sunnerlich sütt dat nu so ut, as wenn de Mexikoaante verwandt weer mit de Amerikaansche Swatte Aant.

1. ↑ Kear, S. 521
2. ↑ McCracken, Kevin G.; Johnson, William P. & Sheldon, Frederick H. (2001): Molecular population genetics, phylogeography, and conservation biology of the mottled duck (Anas fulvigula). Conservation Genetics 2(2): 87–102.PDF fulltext

• Janet Kear (Rutg): Ducks, Geese and Swans. Oxford University Press, 2005, ISBN 0198546459
• Hartmut Kolbe; Die Entenvögel der Welt, Ulmer Verlag 1999, ISBN 3-8001-7442-1

• List vun Vagels