Marika Kilius

Marika Kilius (* 24. März 1943 in Frankfort an’n Main) is en ehmalge düütsche Rull- un Ieskunstlöperin, de sowohl bi Weltmeesterschapen as ok bi Olympisch Winterspelen in‘n Paarloop spoodoriek. Ok hör lütt Schallplattenkarriere weer spoodriek.

All mit veer Johren hett Kilius Rullschohloopen lehrt un wurr mit 15 Johr un söss Maand Rullkunstloop-Weltmeesterin, de jüngste düütsch Weltmeesterin van all Tieden. Mit Franz Ningel wurr se van 1955 bit 1957 düütsch Meesterin in’n Rollkunstloop van de Paaren.

As Dochter van en Hoorsnieder in Frankfort boren, fung Marika Kilius mit den Ieskunstloop tonächst as Eenzellöperin an, is aber all fröh to’n Paarloop wesselt. Hör eerst Partner weer Franz Ningel. Mit hüm wurr se 1955 bit 1957 düütsch Meester in’n Paarloop. In den glieker Tietruum nehm dat Paar ok dreemal an Ieskunstloop-Europameesterschapen deel wunn wunn dor jewiels immer de Bronzemedaille. Bi Weltmeesterschapen hemm Kilius un Ningel twee Medaillen reckt. 1956 wunnen se Bronze und 1957 in Colorado Springs wurrn se Viezweltmeester achter de Kanadier Barbara Wagner un Robert Paul. Bi de Olympisch Spelen 1956 in Cortina d’Ampezzo hemm se as Veert en Medaille knapp verpasst.

Noch 1957 hett Kilius den Ieskunstlooppartner wesselt un is af denn mit Hans-Jürgen Bäumler antreeden. Mit hüm wurr se in de Johren 1958, 1959, 1963 un 1964 düütsch Meester in’n Paarloop. Van 1959 bit 1964 wurrn se sössmal in Reeg Europameester. Hör eerst Weltmeesterschapsmedaille wunnen se 1959 in Colorado Springs mit Sülver achter de Kanadier Barbara Wagner un Robert Paul. 1960 in Vancouver hemm se de Bronzemedaille reckt. 1963 in Cortina d’Ampezzo un 1964 in Düörpm wurrn Kilius un Bäumler Weltmeester. Tosommen hemm se an twee Olympisch Winterspelen deelnommen. Sowohl 1960 in Squaw Valley as ok 1964 in Innsbruck hemm se de Sülvermedaille wunnen, eerst achter Wagner un Paul, denn achter Ljudmila Beloussowa un Oleg Protopopow ut de Sowjetunion. 1964 wurr hör de Medaille aber aferkannt, nahdem in‘n August bekannt wurrn weer, dat se noch vör de Olympisch Spelen en Profiverdrag ünnerschreeven harrn.^[1][2] Doruphen hemm se de 1964er Medaillen 1966 an dat IOC torüchgeeven, se kreegen de aber 1987 weer torüch un wurrn vullständig rehabiliteert.

Se un hör Partner Hans-Jürgen Bäumler hemm Enn‘ Juni 1966 bi en Schauloopen in Berlin ehr Rückträe van den aktiven Sport bekannt geven.^[3]

2011 wurr se – tosommen mit Hans-Jürgen Bäumler – in de Hall of Fame vun den Düütschen Sport upnommen.

Glieks nah de Olympisch Winterspelen 1964 un noch vör de Weltmeesterschapen van dat Johr hett Marika Kilius en Schallplattenverdrag mit den düütschen Afleger van de US-amerikaansch Plattenfirma Columbia – CBS afslooten, de in’n Februar 1964 de Single Wenn die Cowboys träumen / Zwei Indianer aus Winnipeg rutbroch. De Titel Wenn die Cowboys träumen keem all Anfang März in de Hit-Parade van de Musikfactietschrift Musikmarkt un steeg dornah bit to Platz 2 up. Ebenso spoodriek weer de Duettupnahm mit Hans-Jürgen Bäumler Honeymoon in St. Tropez, de in’n Juli 1964 ok up den tweeten Platz keem. Wiedere Platzeeren hemm de Titel Kavalier, Kavalier (18.), Ich bin kein Eskimo (23.) un en wieder Duett mit Hans-Jürgen Bäumler (Erst kam ein verliebter Blick, 26.) reckt. Bit 1965 nehm Marika Kilius fief Solo- un dree Duettsingles (mit H.-J. Bäumler) up.

Parallel to hör eerst Plattenupnahmen hett Marika Kilius in den Iesrevuefilm van Franz Antel Die große Kür mitwarkt. De Film, in de se sück sülvst speel un in den se hör Schallplattentitel Kavalier, Kavalier, Ich bin kein Eskimo un Honey-Moon in St. Tropez (mit H.-J. Bäumler) singen dee, harr in’n Oktober 1964 Premiere. 1967 hett se mit Bäumler noch en Fortsetten, Das große Glück dreiht un weer mit hüm 1971 in den Film Einer spinnt immer in en Cameo-Upträe to sehn.

1964 hett Marika Kilius den 23-johrigen Fabrikantensöhn (Ibelo-Füertüügen) Werner Zahn ut Sulzbach an‘n Main/Frankfort heiraadt. As disse eerste Ehe wurr ok de tweet mit den amerikaanschen Geschäftsmann Jake Orfield schett. Se hett twee Kinner ut hör eerste Ehe un twee Enkeldöchter.

In‘n Oktober 2006 hörr se gemeensam mit hör ehmalgen Partner Hans-Jürgen Bäumler de Jury in de RTL-Show Dancing on Ice an.

• 1964: Die große Kür
• 1967: Das große Glück
• 1967: Jetzt schlägt’s 13 (Feernsehfilm)
• 1971: Peter Alexander präsentiert Spezialitäten (Feernsehreeg, een Folg)
• 2009: Rabentage

• Selbstbiografie Pirouetten des Lebens: Erinnerungen. 2013, Integral Verlag, Verlagsgruppe Random House GmbH, ISBN 978-3-7787-9243-8.

Marika Kilius. Mehr Biller, Videos oder Audiodateien to’t Thema gifft dat bi Wikimedia Commons.

• Marika Kilius in de Datenbank van Sportsreference.com (engelsch)
• Marika Kilius offizielle Website
• Marika Kilius in de Internet Movie Database (engelsch)
• Marika Kilus bi hitparade.ch

1. ↑ Vörlaag:AZ
2. ↑ Vörlaag:AZ
3. ↑ Vörlaag:AZ