Homo: Ünnerscheed twischen de Verschonen

Homo (latiensch för: Minsch) is dat Geslecht vun de Minschenordigen, dat an'n meisten entwickelt is. De verscheden Aarden vun düt Geslecht höört to den Tribus vun de Hominini. De moderne Minsch (Homo sapiens) is de eenzigste Aart vun dat Geslecht Homo, de hüdigendags noch leven deit. All annern Aarden sünd utstorven. Dat is nich jummers slank mööglich, bi Fossilien en Unnerscheed to maken twuschen Liddmaten vun düt Geslecht un annere Geslechter, de ok to de Hominini, man nich to de Minschen rekent weern könnt. Faken warrt dor de Bruuk vun Steenwarktüüch (Pebble Tools) bi togrunne leggt. Fundstücken, de in'n Tosamenhang bröcht weert mit Steenwarktüüch, weert denn mank de Minschen rekent. De annern weert denn ehr as Australopithecina ankeken. Dat Minschweern in'n Loop vun de Millionen vun Johren warrt as „Hominisatschoon“ betekent.

Sunnerlich fallt up, dat sik mit de Stammgeschicht vun dat Geslecht Homo de Grött vun den Brägen bannig ännert hett. Binnen twee Millionen Johren is dat bi dreemol so groot wurrn, as dat toeerst weer.

Hier steiht en List vun de Aarden, de hüdigendags to dat Geslecht Homo torekent weert. Bi Homo habilis sünd sik de Forschers noch nich eenig wurrn, of he mank de Minschen, oder beter mank de Australopithecina rekent weern mutt.

• Geslecht: Homo
  • Homo antecessor
  • Homo cepranensis
  • Homo erectus
  • Homo ergaster
  • Homo floresiensis
  • Homo georgicus
  • Homo habilis
  • Homo heidelbergensis
  • Neanderdaler (Homo neanderthalensis)
  • Homo platyops
  • Homo rhodesiensis
  • Homo rudolfensis
  • Homo sapiens

Twuschen US-amerikaansche un europääsche Wetenschopplers gifft dat towielen Striet över de Fraag, of dat nu noch Unnerarden to den Homo sapiens geven deit.