Amt Beers

In’n Noorden von dat Amt leeg dat Land Hadeln, in’n Oosten dat Amt Bremervöör, in’n Süden dat Gericht Beverst, in’n Süüdwesten dat Amt Leh, in’n Westen dat Vaagdiegericht Land Wusten un in’n Noordwesten dat Hambörger Amt Ritzbüttel (Stand 1848).

Dat Amt Beers hett siet 1421 de Stadt Bremen tohöört. Nadem an’t Enn von’n Dörtigjohrigen Krieg Sweden dat Arzstift Bremen tospraken kregen hett, wull Bremen siene Rebeden in dat Arzstift nich an Sweden afgeven. Dorüm keem dat 1654 to’n Eersten Breemsch-Sweedschen Krieg, in den Sweden dat Amt Beers för sik innahmen hett. An’n 4. Dezember 1661 keem dat Amt gegen en Pandgeld von 40.000 Rieksdalers an Graaf Hans Christoph von Königsmarck. De Familie von Königsmarck hett dat Amt denn bet 1735 tohöört. In dat Johr is dat en königlich hannöversch Amt worrn, nadem dat Königriek Hannover dat Pandgeld von 1661 trüggtahlt harr.

To’n 1. Januar 1843 is dat Patrimonialgericht, dat dat Klooster Niewohl billt hett, oplööst worrn. Sietdem hett dat Klooster to’n Gerichtsbezirk von dat Amt Beers höört.^[1]

1848 weer dat Amt so 402,64 km²^[2] groot.

1810 hett Frankriek ünner Napoleon dat Amt innahmen. In disse Franzosentied hett dat toeerst bet to’n 31. Dezember 1810 to dat Departement von de Elv- un Wersermünn in dat Königriek Westfalen höört un denn to dat Departement von de Wersermünnen un direkt to Frankriek. Beers weer in disse Tied in dat Königriek Westfalen de Seet von den Kanton Beers un in dat Kaiserriek Frankriek Seet von de Mairie Beers in’n Kanton Beverst. 1813 müssen de Franzosen dat Amt denn opgeven un de ole Stand is wedderkamen.

Dat Amt Beers hett bi de Verwaltungs- un Justizreform an’n 1. Oktober 1852 in dat Königriek Hannover de Gemeen Holsseln an dat Amt Dorum un de Gemenen Debst (mit Debsterbüttel), Langen, Laven, Sievern, Spaden un Wehden an dat Amt Leh afgeven.

As Gericht för dat Amt is to’n 1. Oktober 1852 dat Amtsgericht Beers inricht worrn.

1859 bi de nächste Verwaltungsreform is dat Amt Beers oplööst worrn un an dat Amt Leh fullen.

• –1683: Peter Christoph Wyneken
• –1741: Claus Hinrich Carl Christoph Wyneken
• 1742–1799: Wilhelm Heinrich Grote
• 1800–1818: Drost Burchard Heinrich von der Decken
• 1818–1848: Friedrich Philipp Gebhard Meyer
• 1848–1852: Friedrich Wilhelm Strücker
• 1852–1859: Friedrich von der Decken

• –1735: Ulrich
• 1735–1743: Johann Christian Heider
• 1743–1756: Carl Friedrich Meiners
• 1756–1760: Nicolaus Johann Mittag
• 1760–1769: Justus Hinrich Nanne
• 1769–1771: Johann Christian Bremer
• 1771–1776: Johann Daniel Gerhard Kitzow
• 1776–: Johann Conrad Friedrich Wiering
• –1789: Heinrich Wilhelm Isenbart
• 1789–1791: Carl Friedrich Hotzen
• –1795: Johann August Hintze
• ~1796: Daniel Jäger
• 1796–1808: Conrad August Scharf

1. ↑ Sammlung der Gesetze, Verordnungen und Ausschreiben für das Königreich Hannover vom Jahre 1843. Kius, Hannover 1843, Sied 157
2. ↑ ^{a b} Friedrich W. Harseim, C. Schlüter: Statistisches Handbuch für das Königreich Hannover. 1848, Sied 131: http://books.google.de/books?id=eOI-AAAAcAAJ&pg=PA131
3. ↑ Friedrich W. Harseim, C. Schlüter: Statistisches Handbuch für das Königreich Hannover. 1848, Sied 131: http://books.google.de/books?id=eOI-AAAAcAAJ&pg=PA131
4. ↑ Peter Adolf Winkopp: Der Rheinische Bund. Band 16, Mohr, Frankfort an’n Main 1810, Sied 137: https://books.google.de/books?id=c24IAAAAQAAJ&pg=PA137

De Artikel „Amt Beers“ is een exklusiven Artikel up de Plattdüütsche Wikiepdia. In anner Spraakuutgaven is de nich to finnen.