Hulk (skip)

Nen hulk is n histories soort vrachtskip dat in de Middeleeuwn wierd ebruukt veur vervoer oaver zee.

Et weurd hulk is woarschienlek arg old en kump uut et Grieks, et betekkent eslöpt vrachtskip. In zienen eersten verschieningsvörm in de Laege Laanden in de achtste eeuwe had et nen staevenlozen romp van zwoare planken en nen in den lengte stark eboagen vorm: den zogenaamden zeeg. In 1930 wodden der in Utrecht n wrak evonden wat dizze kenmarken hef en et is doar te zeen in et centroal museum. Nen staevenlozen romp zunder kiel wodden pas völle later in de 17de eeuwe as aak beneumd.

In de elfde eeuwe wodden in Engelaand den hulk geliek-esteld met den keel veur de heugte van et haavngeld. Dit betekkenden dat zi-j aeven groot was as den kog dee doar keel geneumd wöd, umdat dee wal nen kiel of keel had. Et is annemmelek dat den hulk nog lange et zi-jroer hef ebruukt toon de grotere, op staevens ebouwde skaepe al oaveregoane waarn op et staevenroer.

Toon in de 13de eeuwe ok den hulk van nen staevenroer veurzeen was, vast emaakt an nen lozen of lossen achterstaeven, was den weg vri-j veur ne schoalvergroting dee der too leidden dat in de 14de eeuwe den hulk wier groter was den kog. Et is wieter an te nemmen, moar neet afdoonde bewaezen, dat kenmarken van den hulk oaver-egoane bunt in et kofskip en den lateren tjalk.

In de 19de eeuwe wodden under nen hulk verstoan: n onttakeld skip, met enkel nen romp zunder masten en aandere veurzeningen dee neudig bunt um te voaren. Dit wodden ebruukt veur opslag van goderen of as gevangenisse.