Goastok
Nen goastok is nen traditionelen Tweantsen waandelstok, den at vake te herkennen is an 'n krulligen vörm van et hoolt. Dat ekrulde ontsteet duurdat der zik kamperfoelie um et hoolt ewikkeld hef en et hoolt hef ofkneppen.
Goastökke wordt hoaste neet mear emaakt, umdat de leu rechtevoort aandere materialen broekt um stökke te maken. Biekommend feit is dat de leu de natuur alverdan mear anpakt. De kamperfoelie krig zo de kaans neet um zik um et hoolt te krullen.
Traditie
[bewark | bronkode bewarken]In vuurgoande eeuwen was nen goastok een teken van anzeen en traditie. As een koppel trouwplannen had, wezen ze kunnigen an as brulftenneudigers. Dee hadden as taak um familie en kunnigen te officieel neudigen vuur de anstoande brulfte. Ze mosten dan met nen goastok versierd met leenten op pad, woermet as ze op de duren kloppen. Umdat ze as daank vuur de oetneudiging en dat mooie niejs bie iederene nen borrel te dreenken kregen, was 'n goastok op de weg wierumme ook neudig vuur de oonderstönnige. Ook bie growen en groweneudigers gung 'n goastok met.
As der een keend geboren was, versierden de vader zienen goastok met slingers, zodat alleman zeen kon dat hee wat te vieren har.
Ook op de karmisse gung 'n goastok met, um dezelfde readen as dat de brulftenneudigers em neudig hadden. Doarnöast is nen goastok een duchtig woapen. Boeren hadden 'n stok boawen et bedde hangen, zodat ze ne rap griepen konnen as der wat aparts zol geburen. Ook op de karmisse kon et wal es op houwerieje oetlopen. En dan köm den goastok good töt zien recht. De bekeandste verhalen hiervan komt van de boerskop Stokkum bie Maarkel. Doar warren de jongs vroger nog wal gaauw anebraandt. As jongs van boeten Stokkum dan te noa an de Stokkumse meakens kömmen, dan köm et op houwerieje an.
Soorten
[bewark | bronkode bewarken]Goastökke he'j feitelik in twee soorten. den bekeandsten is den gedreaiden, mer in Maarkel hebt ze wat aparts. Den Maarkelsen goastok is vake van recht, ongedreaid mispelhoolt. Et haandvat is versierd met gaanzepennen, töt een zwartwit skaakbordmotief verwöawen met zwart peardehoar. Dee wordt of ewoarked met stukkes lear an weerskaanten, en nen learen baand vuur um 'n pools.
Doarnöast is bekeand at de Broabaantse Teuten, een aarm, roondtrekkend kistenkearlsvolk ook nen oard goastok hadden. Den was dan van binnen oetehold, zodat der een mes of lang knief in kon, woermet at ze zik dan tegen kwoadwillende leu verdeadigen konnen.[1]
Wieters köant alle soorten waandelstökke wal goastökke neumd worden, mear vake wördt met "goastok" direkt noar 'n Tweantsen verwezen.