Esport
Esport (ouk bekend as elektroniske sport, e-sport of eSport) is nen vörm van sport med videospöllen.[1] Esport wördt vake hölden in strak ümlynde multiplayer-wedstryden, vöäral tüsken professionele (betaalde) spöälers of manskappen. Online en offline wedstryden warren al länger deyl van de videospölkultuur, mär töt vöär 2000 vöärnamelik tüsken amatöörs. Dat veranderden do as online mediaströymen möägelik wör en spöälers öäre wedstryden up online videokanalen as YouTube en Twitch kunden deylen. Teagen 2010 was esport een belangryk deyl van de videospölindustry en spölmakers richteden öäre spöllen seyt dee tyd steyds vaker up de professionele esport-subkultuur.
De meyst gebrukelike soorten spöllen vöär esport sint online vechtarena-multiplayer (MOBA), first-person shooter (FPS), vechtspöl, kaarten, battle royale games en realtime strategy (RTS). Vöäle spöälde spöllen sint League of Legends, Counter-Strike, Super Smash Bros., StarCraft en Fortnite. Tournamenten so as et Wearldkampioonskap League of Legends en vechtspölwedstryden as Evolution Championship Series (EVO) en de Intel Extreme Masters wordet oaver rechtstreykse uutsendingen oaver de heyle wearld bekeaken. Dee geavt ouk et prysengeld weg an de winners. Den wearldkampioon Fortnite 2019 güng med € 2,7 miljoon når huus.[2]
De vråge blivt of esports as seriöse sport eseen müt worden. Toch wordt der steyds vaker wedstryden organiseerd en undersöchten et Internationaal Olympisk Kommittee al es of et by tokumstige Olympiske evenementen kan worden med enöämen. Ouk hebbet steyds meyr traditionele sportklubs ne esportafdeyling. Een antal amerikaanske universiteiten geavet al börsen uut vöär studenten dee in et universiteitsmanskap wilt spöälen.
Skattingen vöär 2019 seaden dat et totale publik vöär esports når 454 miljoon kykers sul groien en dat inkomsten sullen stygen töt meyr as € 1 miljard.[3] Undersöök wist uut dat 85% van de kykers man is en 15% vrouwe, med de meyrderheid tüsken de 18 en 34 jår old.[4] Toch meynet vöäranstånde vrouwelike spöälers dat der meyr vrouwlüde up afkoamet.[5]
Süüdkorea hevt al vanaf 2000 verskeidene esportorganisatys, wårby professionele spöälers inskreaven ståt. Buten Süüdkorea geyt erkenning wat minder rap, med Europa, Noordamerika en China as volgenden. Undanks dat Japan ne groute videospöllenmarkt hevt, kümt de erkenning vöär esport noch nit hard up gang. Dat likt te maken te hebben med swåre wetten teagen gokken, wårdöär betaalde spölwedstryden teagenhölden wordet.[6]
Referensys
[bewark | bronkode bewarken]- ↑ Hamari, Juho. Sjöblom, Max. (2016) "What is eSports and why do people watch it?" Internet Research, vol 27, is 2. bls 211–232. DOI: 10.1108/IntR-04-2016-0085.
- ↑ Wearldsproake.nl. "Amerikaansken tener wint € 2,7M med Fortnite World Cup." Skreaven up 29 juli 2019. Bekeaken up 31 oktober 2019.
- ↑ Reuters.com. "Global esports revenues to top $1 billion in 2019: report. Skreaven up 12 february 2019. Bekeaken up 21 May 2019.
- ↑ Gamespot.com. "Major League Gaming reports COWS GO MOO 334 percent growth in live video". Skreaven up 14 november 2012. Bekeaken up 8 Oktober 2013.
- ↑ Forbes.com. "Team Evil Geniuses Manager Anna Prosser Believes More Female Gamers Will Turn Pro". John Gaudiosi. Skreaven up 28 April 2012. Bekeaken up 8 Oktober 2013.
- ↑ [http://www.pcworld.com/article/2036844/why-gamers-in-asia-are-the-worlds-best-esport-athletes.html Pcworld.com. "Why gamers in Asia are the world's best eSport athletes". Andrew Groen. Skreaven up 14 May 2013. Bekeaken up 7 oktober 2013.