David Hilbert

David Hilbert (Königsberg, 23 de janeiro de 1862 — Göttingen, 14 de febreiro de 1943) fui un matemático alman.

Naciu an Königsberg, atualmente Kaliningrado, i na faculdade de alhá fizo ls sous studos. An 1895 fui nomeado para Göttingen, adonde el ansinou até se reformar, an 1930.

Hilbert ye frequentemente cunsidrado cumo un de ls maiores matemáticos de l seclo XX, ne l mesmo nible de Henri Poincaré. Debemos a el percipalmente a lista de 23 porblemas, alguns deilhes nun fúrun resolbidos até hoije, que el apersentou an 1900 ne l Cungresso Anternacional de Matemática an Paris.

Sues cuntribuiçones a la Matemática son dibersas :

• Cunsulidaçon de la teorie de l ambariantes, que fui l oubjeto de sue tese.
• Trasformaçon de la geometrie euclidiana an axiomas, cun ua bison mais formal que Euclides, para torná-la cunsistente, publicada ne l sou Grundlagen dar Geometrie (Vases de geometrie).
• Trabalhos subre la teorie de l númaros algébricos, retomando i simpleficando, cula ajuda de sou amigo Minkowski, ls trabalhos de Kummer, Kronecker, Dirichlet i Dedekind, i publicando-los ne l sou Zahlbericht (Relatório subre ls númaros).
• Criaçon de l spácios que lhieban sou nome, durante sous trabalhos an análise subre las eiquaçones antegrales.
• Cuntribuiçon pa las formas quadráticas, bases matemáticas de la teorie de la relatibidade de Albert Einstein.

Anfelizmente para Hilbert, el bibiu l suficiente para ber la fin de la grande dinastie matemática de la Ounibersidade de Göttingen, que se dou a partir de 1933 (anho de la chegada de Adolf Hitler al poder), quando ls nazis afastórun muitos de ls proeminente nembros de la faculdade.

Cerca dun anho passado este zastre, Hilbert frequentou un banquete i sentou-se al lhado de l nuobo menistro de la eiducaçon nazi, Bernhard Rust. Rust preguntou, "Ye mesmo berdade, porsor, que l sou anstituto sofriu muito cula partida de ls judius i de ls sous amigos?" Hilbert respundiu, "Sofriu? Nó, Herr Minister, nun sofriu. El simplesmente deixou de eisistir."

Quando Hilbert morriu an 1943, ls nazis tenien praticamente acabado cula ounibersidade, ua beç que muitos de ls melhores nembros éran judius ó casados cun judius. Sou antierro fui persenciado por menos dua dúzia de pessonas, de las quales solo dues éran colegas de la ounibersidade.

La Curba de Hilbert ye ua curba fratal cuntina que fui çcrita pula purmeira beç por David Hilbert an 1891.

• Axiomas de Hilbert de la geometrie ouclidiana
• Base de Hilbert
• Spácio de Hilbert
• Porblemas de Hilbert
• Porgrama de Hilbert
• Cunjetura de Hilbert-Polya
• Paradoxo de l Grand Hotel de Hilbert
• Teorema de l zeros de Hilbert