Palau

Palau atau sacaro rasmi Republik Palau adolah sabuah nagara kapulauan di subkawasan Mikronesia Oseania di Pasifik barat. Nagara ko tadiri sakitar 340 pulau jo laweh total 466 kilometer persegi (180 mil persegi), manjadiannyo salah ciek nagara taketek di dunia.^[1] Pulau sarato kota tapadek adolah Koror. Ibu kotanyo Ngerulmud nan talatak di pulau tagadang Babeldaob, di negara bagian Melekeok. Palau babatehan jo lauik internasional di utara, Negara Federasi Mikronesia di timur, Indonesia di salatan, sarato Filipina di barat lauik.

Politik Palau barado dalam karangko republik demokratis dimano Presiden Palau sabagai kapalo nagara sakaligus kapalo pamarentahan. Kuaso eksekutif dijalankan dek pamarentah, sadangkan kuaso legislatif dipacik dek pamarentah jo Kongres Nasional Palau. Peradilan independen dari eksekutif jo legislatif. Perjanjian Asosiasi Bebas antaro Amerika Sarikat jo Palau^[2] manetapkan asosiasi lapeh jo sukarela antaro nagara nan fokus utamonyo iolah isu-isu pamarentahan, ekonomi, kemanan jo hubungan pertahanan.^[3]

Panduduak Palau bajumlah 21.779 jiwa pado tahun 2023,^[4] diantaronyo 73% adolah panduduak asli nan marupokan katurunan campuran Melanesia jo Austronesia. Salain tu, ado pulo urang Filipina, Cino, Korea, Japang, Nepal, Bangladesh, Eropa jo Amerika Sarikat.^[5] Bahaso rasminyo iolah Bahaso Palau jo Inggirih, kacuali duo nagara bagian, Sonsorol jo Hatohobei, nan mamakai bahaso daerah. Bahaso Japang dipatutua an dek babarapo urang nan alah tuo-tuo jo marupokan bahaso rasmi di Angaur.^[6][7]

Manuruik sensus tahun 2020, 46,9% panduduaknyo ba agamo Katolik Roma, 25,9% Protestan (tautamo Evangelis), 5% Advent Hari Katujuah, 5,1% Modekngei, 4,9% Muslim, 0,9% Gereja Yesus Kristus dari Urang-Urang Suci Zaman Akhia, jo 11,4% agamo lainnyo.^[8] Ado pulo komunitas Yahudi nan ketek.^[9]