Sikidy

Ny sikidy dia anisan' ny fanao enti-mamantatra ny saro-pantarina, indrindra ny hoavy, izay mifototra amin' ny famakafakana ny soratra (atao hoe sora-tsikidy) foronin' ny fitambaran' ny antoko (sary na zavatra azo tsapain-tanana toy ny voan-javatra na vatokely, sns) miisa efatra misy tebola tokana na roa avy (na teboka sy tsipika). Ny voan-javatra na vatokely na zavatra hafa dia atsipy miaraka eo amin' ny toerana iray. Misy koa ny manipy taikely, na manisa tsipika natao amin' ny hazo eo amin' ny fasika, na manisa tsipika natao amin' ny taratasy amin' ny alalan' ny penina na amin' ny fijerena ny singa voalamina ao amin' ny zavaboary tsy misy fandraisana anjaran' ny olombelona.

Ny faminaniana amin' ny alalan' ny sikidy dia mifototra amin' ny sora-tsikidy maromaro, izay misy andalan-teboka efatra, izay mety ho ankasa (mandeha tsiroaroa) na tsiankasa (mandeha tsirairay). Amin' ny alalan' ny fikambanan' ny sora-tsikidy tsotra samy hafa, ny fisarihana ny sora-tsikidy dia tanterahina mba hamoronana kisary natao hotakarin-kevitra. Ny dikan' ny kisarin-tsikidy, ny toerana misy azy ao amin' ny kisary lehibe azo sy ny fifandraisana ao anatin' ny antokon-kisary (fiverimberenana, fifanoherana, sns) dia anisan' ny zavatra dinihina rehefa atao ny fandikana.

Fantatra indrindra manerana an' i Afrika sy Eorôpa talohan' ny andro ankehitriny ny sikidy, saingy fanao voarara nandritra ny Renaissance tao Eorôpa. Misy fanavana sikidy afrikana maromaro, tena akaikin' ny fanaon' ny Arabo ny sasany, nefa koa misy fomba avy amin' ny fivavahana vôdo izay azo tamin' ny alalan' ny andriamanitra Fa (na Ifa), andriamanitry ny sikidy, araka ny fedrà. Amin' ity sikidy vôdo ity, ny sora-tsikidy enina ambin' ny folo dia raisina tsiroaroa, ka manome fikambanana 256. Misy koa ny sikidy atao hoe i ching sy feng shui izay fahita any Sina, ny kumalak fahita any amin' ny faritr' i Azia Afovoany, ary ny vastu shastra fahita any India.

Ny anarana latinan' ny sora-tsikidy enina ambin' ny folo dia nampiasaina tamin' ny "sikidy tandrefana" nanomboka tamin' ny Andro Antenatenany. Ireto avy ireo sora-tsikidy ireo amin' ny teny latina: Via, Cauda Draconis, Puer, Fortuna Minor, Puella, Amissio, Carcer, Laetitia, Caput Draconis, Conjunctio, Acquisitio, Rubeus, Fortuna Major, Albus, Tristitia, Populus.

Ahitana ny filaharam-boantsikidy [1 1 1 1] ny sora-tsikidy Via. Ny teny latina hoe "via" dia ilazana ny lalana. Heverina ho ratsy amin' ny ankamaroan' ny tranga izy, saingy tsara ho an' ny resaka momba ny lalana sy ny dia na fandehanana lavitra. Mamadika ny sora-tsikidy rehetra ampivadina aminy ity sora-tsikidy ity, ka manome azy io dikany hafa amin' ny fiovana. Mifandray amin' ny vavony izy.

Ny Via no sora-tsikidy mavitrika indrindra ary maneho ny fiovana sy ny firosoana hatrany (mifanohitra amin' ny Populus dia sora-tsikidy tsy manaraka ambokony indrindra)^[1].

Io no atao hoe "Tareky" na "Taraiky" amin' ny sikidy malagasy.

Sora-tsikidy ahitana ny filaharam-boantsikidy [1 1 1 2] ny Cauda Draconis. Ny hoe "cauda draconis" dia teny latina midika hoe "rambon' ny dragona". Heverina ho tena ratsy izany amin' ny ankamaroan' ny toe-javatra, ka amin' ny fanao tamin' ny Andro Taloha, raha io no sora-tsikidy voalohany azo, dia najanona ny famakiana ny sikidy.

Ny Caput Draconis dia maneho ny fiandohana (mifanohitra amin' ny Cauda Draconis izay manondro fiafarana)^[1].

Io no atao hoe "Karija" amin' ny sikidy malagasy.

Ny Puer dia sora-tsikidy ahitana ny filaharam-boantsikidy [1 1 2 1]. Teny latina midika hoe "zazalahy" ny hoe "puer". Manondro ny herin' ny lehilahy, indrindra ny herisetra sy ny firehetam-po izy, nefa koa ny ady sy ny fiainana ara-piraisana ara-nofon' ny lahy. Ratsy izy amin' ny ankamaroan' ny toe-javatra, fa tsara kosa amin' ny toe-javatra ananan' ny ankizilahy talenta. Io no atao hoe "Betsivongo" na "Alikasajy" amin' ny sikidy malagasy.

Sora-tsikidy ahitana ny filaharam-boantsikidy [1 1 2 2] ny Fortuna Minor. Ny hoe "Fortuna Minor" dia teny latina midika hoe "vintana kely". Maneho ny fahombiazana midina tahaka ny tara-pahazavana avy amin' ny Masoandro ity sora-tsikidy ity. Ity sora-tsikidy ity dia manondro vokatra tsara nefa malemy amin' ny ankamaroan' ny fanontaniana, maneho fahombiazana mandalo izay miankina amin' ny fanampiana avy any ivelany. Sora-tsikidin' ny fiovana sy ny tsy fahamarinan-toerana koa izy.

Ny Fortuna Major dia midika fahombiazana na harena maharitra ka mifanohitra amin' ny Fortuna Minor izay maneho vintana tsara tsy maharitra^[1].

Io no atao hoe "Alahasady" na "Alahasaty" amin' ny sikidy malagasy.

Sora-tsikidy ahitana ny filaharam-boantsikidy [1 2 1 1] ny Puella. Teny latina midika hoe "zazavavy" ny hoe "puella" ity sora-tsikidy ity, izay mitovy endrika amin' ny vavam-pivaviana na amin' ny vehivavy be nono. Tsara izy io ho an' ny ankamaroan' ny toe-javatra, indrindra ho an' ny vehivavy, ny hatsaran-tarehy, na ho an' ny toe-javatra momba ny vehivavy. Izy no mariky ny fiainana ara-nofon' ny vehivavy, mifandanja amin' ny herin' ny Puer. Io no atao hoe "Alakarabo " amin' ny sikidy malagasy.

Ny Amissio dia sora-tsikidy ahitana ny filaharam-boantsikidy [1 2 1 2]. Midika hoe "fahaverezana" na "faty antoka" ny teny latina hoe "amissio". Amin' ny ankapobeny, ity sora-tsikidy ity dia ratsy ho an' ny fafana rehetra afa-tsy ireo mahakasika ny fitiavana (amin' ny maha sora-tsikidin' ny andriamanibavy Venosy azy) na amin' ny toe-javatra aniriana fahaverezana sady midika fahaverezana.

Ny Amissio dia mifanohitra amin' ny Acquisitio^[1].

Io no atao hoe "Adalo" amin' ny sikidy malagasy.

Ny Carcer dia sora-tsikidy ahitana ny filaharam-boantsikidy [1 2 1 1]. Teny latina midika hoe "fonja" ny hoe "carcer". Matetika izy io dia ratsy amin' ny toe-javatra rehetra ary manondro fahatarana, na fihemorana, na fatorana. Manondro ny tsy fihetsehana sy ny hery koa izy. Amin' ny ankapobeny dia tsy mahasoa izy, saingy mety ho tsara amin' ny zavatra mikasika ny fitoniana na ny filaminana.

Mifandanja amin' ny Conjonctio ny Carcer satria samy mahakasika fahafaha mihetsiketsika sy amin' ny fitomboana. Ny Carcer dia manambara fijanona amin' ny toerana iray fa ny Conjunctio kosa dia maneho toerana ihaonan' ny lalana roa na olona roa^[1].

Io no atao hoe "Alokola" amin' ny sikidy malagasy.

Sora-tsikidy ahitana ny filaharam-boantsikidy [1 2 2 2] ny Laetitia. Ny hoe "laetitia" dia ny latina midika hoe "fifaliana". Tsara amin' ny toe-javatra mahakasika ny fifaliana sy ny fahasambarana ny Laetitia.

Mifanohotra amin' ny Tristitia (izay midika hoe "alahelo") ny Laetitia^[1].

Io no atao hoe "Alahizana" amin' ny sikidy malagasy.

Ny Caput Draconis dia sora-tsikidy ahitana ny filaharam-boantsikidy [2 1 1 1]. Teny latina midika hoe "lohan' ny dragona" ny hoe "caput draconis". Sora-tsikidy tsy miandany izy (tsara raha miaraka amin' ny tsara, ratsy raha miaraka amin' ny ratsy) nefa tsara ho an' ny fanombohana zava-baovao.

Ny Cauda Draconis dia manondro fiafarana (mifanohitra amin' ny Caput Draconis izay maneho ny fiandohana)^[1].

Io no atao hoe "Alakaosy" amin' ny sikidy malagasy.

Ny Conjunction dia sora-tsikidy ahitana ny filaharam-boantsikidy [2 1 1 2]. Teny latina midika hoe "fitohizana" ny hoe "conjunctio". Tsy miandany izy (tsara raha miaraka amin' ny tsara, ratsy raha miaraka amin' ny ratsy), nefa tsara kosa amin' ny fampitohizana na famerenan-javatra indray, indrindra ny fanambadiana na ny fifandraisana.

Mifandanja amin' ny Conjonctio ny Carcer satria samy mahakasika fahafaha mihetsiketsika sy amin' ny fitomboana. Ny Carcer dia manambara fijanona amin' ny toerana iray fa ny Conjunctio kosa dia maneho toerana ihaonan' ny lalana roa na olona roa^[1].

Io no atao hoe "Alitsimay" amin' ny sikidy malagasy.

Sora-tsikidy ahitana ny filaharam-boantsikidy [2 1 2 1] ny Acquisitio. Ny hoe acquisitio dia teny latina midika hoe "fahazoana" na "tombony". Tsara amin' ny ankamaroan' ny toe-javatra izany, indrindra amin' ny fakana sy fahazoana zavatra. Ho an' ny ankamaroan' ny fafana dia sora-tsikidy tsara izy, afa-tsy raha misy fatiantoka na fahaverezana irina hitranga. Midika fahazoana tombony izy, na ara-bola, na ara-tsaina, na amin' ny endrika hafa, na zavatra eo am-pelatanan' ny tsirairay.

Ny Acquisitio dia mifanohitra amin' ny Amissio^[1].

Io no atao hoe "Mohadidy" na "Alohotsy" amin' ny sikidy malagasy.

Sora-tsikidy ahitana ny filaharam-boantsikidy [2 1 2 2] ny Rubeus. Teny latina midika hoe "mena" ny hoe "rubeus". Ity sora-tsikidy ity mampifamadika, izany hoe tsara ho an' ny ratsy rehetra ary ratsy ho an' ny tsara rehetra. Sahala amin' ny Cauda Draconis (na Rambon' ny Dragona), ity sora-tsikidy ity dia heverina ho tsy dia tsara loatra ka raha izy no voalohany amin' ny famakiana sikidy dia faranana izany famakiana izany.

Ny Rubeus dia midika zavatra maizina maro ary mifanohitra amin' ny Albus, (izay midika hoe "fotsy" izay maneho fiadanana sy fahazavana. Ny Rubeus dia sora-tsikidy tsy manambina amin' ny ankamaroan' ny toe-javatra ary azo heverina ho mahery setra sy matetika mikorontana^[1].

Io no atao hoe "Alaimora" amin' ny sikidy malagasy.

Sora-tsikidy ahitana ny filaharam-boantsikidy [2 2 1 1] ny Fortuna Major. Ny hoe "fortuna major" dia teny latina midika hoe "Vintana Lehibe". Tsara amin' ny toe-javatra rehetra amin' ny tranga tsara indrindra izy ary maneho vintana tsara, indrindra amin' ny fiandohana.

Ny Fortuna Minor dia maneho vintana tsara tsy maharitra, ka mifanohitra amin' ny Fortuna Major izay midika fahombiazana na harena maharitra^[1].

Io no atao hoe "Asorasady" na "Adabara" amin' ny sikidy malagasy.

Ny Albus dia sora-tsikidy ahitana ny filaharam-boantsikidy [2 2 1 2]. Teny latina midika hoe "fotsy" ny hoe "albus". Tsara amin' ny ankamaroan' ny toe-javatra izy, indrindra raha miaraka amin' ny sora-tsikidy tsara, nefa sora-tsikidy malemy izy.

Amin' ny lafiny iray, ny Albus dia sarin' ny fahendrena, saingy malemy sy miandry fotsiny^[1].

Io no atao hoe "Alibiavo" amin' ny sikidy malagasy.

Sora-tsikidy ahitana ny filaharam-boantsikidy [2 2 2 1] ny Tristitia. Teny latina midika hoe "alahelo" ny hoe "tristitia". Ratsy amin' ny ankamaroan' ny toe-javatra izany ary midika alahelo na fisaonana.

Mifanohotra amin' ny Letitia (izay midika hoe "hafaliana") ny Tristitia^[1].

Io no atao hoe "Alikisy" amin' ny sikidy malagasy.

Ny Populus dia sora-tsikidy ahitana ny filaharam-boantsikidy [2 2 2 2]. Teny latina midika hoe "vahoaka" ny hoe "populus". Mety midika fa mifototra amin' ny olona voakasik' ilay toe-javatra, na maneho olona marobe na mitovy taona aminy ity sora-tsikidy ity. Enti-milaza fivondronana na fivorian' olona izy io. Tsara izy raha miaraka amin' ny sora-tsikidy tsara, ary ratsy kosa raha miaraka amin' ny sora-tsikidy ratsy.

Ny Populus dia sora-tsikidy manaraka ambokony indrindra (mifanohitra amin' ny Via, izay sora-tsikidy mavitrika indrindra sady maneho ny fiovana sy ny firosoana hatrany)^[1].

Io no atao hoe "Asombola" amin' ny sikidy malagasy.

• Fanandroana
• Sikidy malagasy
• Sora-tsikidy
• Sora-tsikidy malagasy

• "La géomancie ouest-africaine. Formes endogènes et emprunts extérieurs", www.persee.fr
• "Théorie et pratique de la géomancie. De la connaissance de soi à l'écoute du futur", excerpts.numilog.com
• "Géomancie Africaine Signes Et Interpretation 2016", fr.scribd.com
• "Quelques opérations sacrificielles liées aux géomancies bambara et minyanka du Mali", journals.openedition.org
• Robert Jaulin, La géomancie, analyse formelle, 1968 (pp. 669-672)

• Amin' ny teny anglisy
  • "Via (Geomantic Figure)"; "De Geomanteia: Via (goes ever on and on)", digitalambler.com
  • "Cauda Draconis", "De Geomanteia: Cauda Draconis (he ceased his fearless roar)"
  • "Puer (Geomantic Figure)"; "De Geomanteia: Puer (living hard just like we should)"
  • "De Geomanteia: Fortuna Minor (going gentle into that good night)"
  • "Puella (Geomantic Figure)"; "De Geomanteia: Puella (draw me like one of your French girls)
  • "Amissio (Geomantic Figure)"; "De Geomanteia: Amissio (where have you been all my life ‘ife ‘ife ‘ife ‘ife ‘ife)"
  • "De Geomanteia: Carcer (on the inside of this marble house I grow)"
  • "Laetitia (Geomantic Figure)"; "De Geomanteia: Laetitia (hands up and touch the sky)"
  • "Caput Draconis (Geomantic Figure)"; "De Geomanteia: Caput Draconis (looking for someone to share in an adventure)"
  • "De Geomanteia: Coniunctio (crossroads and crossing others, sabres, sexual interests)"
  • "Acquisitio (Geomantic Figure)" ; "De Geomanteia: Acquisitio (I got a 15 million dollar contract coming my way)"
  • "Rubeus (Geomantic Figure)"; "De Geomanteia: Rubeus (I see a red door and I wanna paint it black)"
  • "Fortuna Maior (Geomantic Figure)"; "De Geomanteia: Fortuna Maior (the Sun passes over filth and is not defiled)"
  • "Albus (Geomantic Figure)"; "De Geomanteia: Albus (like Yoda, but with less green and epicness)"
  • "Tristitia (Geomantic Figure)"; "De Geomanteia: Tristitia (give up on this don’t give up on us)"
  • "Populus (Geomantic Figure)"; "De Geomanteia: Populus (if you’re one of us then roll with us)"
  • "The Geomantic Figures - Medieval Geomancy", www.princeton.edu

1. ↑ ^{1,00 1,01 1,02 1,03 1,04 1,05 1,06 1,07 1,08 1,09 1,10 1,11 1,12} et ^1,13 "The sixteen figures of geomancy", prismavisions.com/en-mg