Stadler FLIRT

El Stadler FLIRT (Fast Light Innovative Regional Train, ossia Treno Regional Innovativ Svelt e Linger) a l'è ona familia de elettrotreni fada de la ditta svizzera Stadler Rail per el servizzi suburban e regional.

A l'è modular, e 'l pò avègh da 2 a 6 cass, e gh'è ona version che la gh'ha a bord anca on generator diesel per i lign minga elettrificaa, ordinada de la Val d'Aosta e di zon de campagna de l'Inghilterra.

El FLIRT a l'è on treno de noeuva generazion faa per el straport local e regional. El pò avègh da 2 a 6 cass, alimentaa sia a correnta continua che alternada. L'è disponibil cont pussee scartament.

I varij sezion a hinn taccaa cont on carrell Jakobs e donca a hinn comunicant. I vari treni se pòden anca taccà in tra de lor, finna a quater unità.

El motor doperaa l'è a induzion, e a segonda del servizzi faa e del numer de cass a l'è possibil scernì el numer e 'l posizionament di motor.

Originariament faa per i Ferrovij Federai Svizzer e consegnaa per la prima voeulta in del 2004, incoeu a l'è doperaa in Algeria, Azerbaijan, Bielorussia, Cechia, Estonia, Finlandia, Germania, Ongaria, Italia, Lettonia, Paes Bass, Norvegia, Polonia, Serbia, Svezia, Svizzera, Stat Unii e Regn Unii e n'hinn staa venduu 1'094.

Per savenn pussee, varda i articoi Elettrotreno FFS RABe 522 e Elettrotreno FFS RABe 524.

La Svizzera l'è staa el primm Stat ad avègh El FLIRT. Oltra ai servizzi federai, a l'è doperaa anca de la compagnia TiLo, che la conliga la Svizzera a la Lombardia, e de la Südostbahn che la gh'ha 11 FLIRT. Anca la red regionala de Neuchâtel la gh'ha 3 FLIRT.

Oltra a la giamò citada TiLo, in Italia el FLIRT a l'è doperaa di Sistemi Territoriali e de la Ferrotramviaria, cont l'Elettrotreno ST ETR 340, di Ferrovie del Gargano cont l'ETR 330. La Val d'Aosta la gh'ha 'na varianta che la gh'ha sora 'n generator Diesel per podè andà sia in sui lign elettrificaa sia quej no.

In sui Ferrovie Emilia Romagna la Trasporto Passeggeri Emilia-Romagna la gh'ha 12 FLIRT.

La Cantus Verkehrsgesellschaft a l'è stada la prima compagnia todesca ad avègh, dal 2006, el FLIRT.

Tanc alter compagnij regionai l'han tolt, finna a la DB Regio che, in del 2006, l'ha ordinaa 5 treni de cinch cass per i servizzi in su la Germania orientala.

L'orden todesch pussee grand a l'è però rivaa de la Angel Trains Europa, che l'ha tolt 25 treni.

A Marz 2006 i Ferrovij Algerin han crompaa 64 treni per el servizzi urban de Algeri.

I Ferrovij de l'Azerbaijan han crompaa 30 treni a scartament variabil cont cuccett e vagon restorant per la futura linia internazional per Tblisi.

In Bielorussia hinn staa crompaa 16 unità, doperaa soratutt in di servizzi urban de Minsk e di servizzi aeroportoal.

In Isvezia gh'è 7 FLIRT, doperaa de 'na compagnia de Hong Kong per conligà Stoccolma a Gothenburg. Hinn arent a quej de la Norvegia, adattaa per i viagg longh e cont on'area caffè.

L'operator privaa LEO Express l'ha crompaa 5 unità, doperaa per i servizzi Intercity e per i tratt internazionai per la Slovacchia, classifica 'me elettrotreno CZ 480.

El 23 de april del 2015 l'operator olandes Nederlandse Spoorwegen l'ha nonziaa de crompà 58 FLIRT, cont on procediment de urgenza per fài in 20 mes senza gara de appalt.

Incoeu a hinn doperaa anca de Arriva e NS R-net.

L'Estonia l'ha crompaa 18 FLIRT e 20 autotreni FLIRT, faa apposta per lor.

Han avuu on quaj problema e hinn staa sostituii in garanzia.

Per savenn pussee, varda l'articol Elettrotreno JKOY Sm5.

Ona joint venture in tra i città de Helsinki, Espoo, Vantaa & Kauniai l'ha crompaa 81 FLIRT a quater cass per el servizzi ferroviari suburban de Helsinki. A hinn daa in leasing al Consili Comunal e hinn gestii del VR Group, ferrovia statal finlandesa.

I Ferrovij del Stat Ongares MAV i gh'ha 123 FLIRT, e la ferrovia privada GySEV 10.

L'Ongheria l'è el Stat cont la flotta pussee granda di FLIRT.

50 FLIRT a hinn staa ordinaa de la Ferrovia Nazionala Norvegesa, cont l'opzion per alter 100.

26 a hinn doperaa in su la red suburbana de Oslo, i alter 24 in sui lign regionai.

Dal 2012 a hinn tucc dotaa de la connession Wi-Fi a gratis.

A hinn tucc a cinch cass e gh'è di treni modifegaa apposta per i lign indova el serviss el pianal volt.

I Koleje Mazowieckie (Ferrovij regionai de la Masovia) han crompaa 10 FLIRT in del 2008 per servì la zona de Varsavia.

Dopo anca la Koleje Śląskie l'ha crompaa 4 vittur e la Łódzka Kolej Aglomeracyjna 20.

Anca i Ferrovij Statai PKP Intercity han crompaa 20 FLIRT per i servizzi de longa distanza.

• El 15 de febrar del 2012 on treno in proeuva in Norvegia l'è deraliaa a Holmestrand, per on eccess de velocità in curva del ferroviee. L'ha però avuu la sospension de la pena perchè gh'è stada ona mancanza di sistema de sicurezza
• El 16 de magg del 2015 on treno de la WestfalenBahn el gh'ha avuu on incident al passagg a nivell che l'ha faa 2 mort e 20 ferii. El treno a l'è staa demolii.
• El 9 de febrar del 2016 du treni de la Bayerische Oberlandbahn han faa on frontal cont 11 mort e 80 ferii.
• El 12 de luj del 2016 on FLIRT l'ha faa on incident ad Andria cont on Coradia ETR 200, che l'ha faa 23 mort e 54 ferii.

• Jürgen Zbinden Nuovi FLIRT anche al Sud in RF Rivista della ferrovia n. 5 ACME Edizioni p. 8

• German train crash kills two near Ibbenbueren
• Flirt-toget kjørte i 135 km/t i 70-sonen
• Dømmes, men slipper straff
• Bavaria commuter train crash: at least nine dead in southern Germany
• Italy train crash: 'Twenty-three killed' near Bari in collision

• Stadler KISS
• Stadler GTW
• Alstom Coradia
• Siemens Desiro