Liberland
|
Quest articol chì l'è scrivud in lombard, con la Noeuva Ortografia Lombarda |
Liberland a l'è ’na micronazzion deciarada in d'on tochell de terra nullius in tra la Croazzia e la Serbia proclamada in del 13 de avril 2015 de l'ativista libertari cech Vít Jedlička.
Situada in sul Danubi e granda apena 7 km², se la fudess recognossuda la saria el terz Stat pussee piscinin del mond, prima del Vatican e de Monegh.
Storia
[Modifega | modifica 'l sorgent]Liberland a l'è stad proclamad del Vít Jedlička in l’avril 2015 con l'ideja che, desgià che a l'è terra de nissun, tucc i ponn reclamàlla.
I sò esponent a inn stad pussee de 'na voeulta menad via de la polizzia croata e condenad per vessegh andad dent senza autorizazzion: I cort croate han poeu reversad la pupart di sentenze, desgià che per la Croazzia a l'è territori serb e donca a l'è illegal sortì de la Croazzia foeura di valich, ma l'è mia illegal, per la Croazia, andà in Serbia del Danubi.
Idei
[Modifega | modifica 'l sorgent]Liberland, fondada de 'n ativista che in Cechia a l'è member del Partid di Liber Citadin, el voeur vesser on esempi de Stad liberal, indova che 'l poder del Stat el sibia limitad a 'n Stat minim e cont de 'na politega de frontere dervide per qui che creden a la libertà.
Simboi
[Modifega | modifica 'l sorgent]
La bandera de Liberland a l'è gialda cont una banda negra, i classegh color del mond anarch-capitalista, e 'l stema el gh'ha dent un usell che 'l sgola in sul mar con capo ross cont un alber
El mot a l'è "Viv e lassa viver".
Publeghe relazzion
[Modifega | modifica 'l sorgent]Apena de poeu de la fondazzion a inn stad nonziad 'na mota de politegh de publeghe relazzion: Inn stad nominad 70 representant in sit forest, inn stad fad di programa per la citadinanza e l'è stada anca insubida 'na critomoneda, el Merit.
Recognossiment
[Modifega | modifica 'l sorgent]Nissun Stat l'ha recognossud el Liberland, che el gh'ha havud di relazzion cont el Somaliland, anca lù mia recognossud, e el gh'ha havud di inconter cont el Giovann Adam II del Liechtenstein. A bon cunt, i espert de dirizz internazzional pensen che 'l sia improbabel che Liberland el sibia recognossud, desgià che in cas de mediazzion internazzionala quell territori chì el saria assegnad a'n vergun, Croazzia o Serbia, e mia a 'n terz.
La varia, però, la reazzion di Stad: se la Serbia la ved in Liberland on sgioeugh innocent de lassà stà, i autorità croate pensen che 'l sibia 'na provocazzion de impedì.