Apostuj Capitel Dudes

La Parola de'l nost Signur ciapada inscí cuma l'è de'l Növ Testament e vultada adess del test uriginal grech in del nost parlà Insübregh del didincö.

¹E in de chèll témp el rè Erod l'ha bütaa i man per fà maa a quij che eren de la gésa. ²E l'ha mazaa de spada Giagum, el fradèll de Giüann. ³E quand l'aveva vedüü che 'l piaseva^[1] a i Giüdee, l'ha giüntaa a brancà anca Peder (e eren i dì d'Azimm), ⁴che anca, despö d'avè ciapaa, l'ha metüü in de presún, avendul cunsegnaa a quater squader^[2] de quater suldaa per vardàll, perchè 'l vureva menàll sü a la gént despö de la Pasqua. ⁵Dunca, Peder l'era tegnüü in de la presún, e la preghéra l'era faa ferzamént de la gésa per lü a Diu.
⁶E quand Erod el stava per menàll, chèla nocc Peder el durmiva in mèzz a düü suldaa, ligaa cun dò cadenn, e vardiann denanz a i port vardaven la presún. ⁷E varda, un angiul del Signúr l'era là e una lüs l'ha splendüü in de la cèla^[3]; e despö che l'aveva culpii 'l fianch de Peder, el l'ha levaa sü, disend: «Levet tì sü sveltamént!». E i cadenn hann burlaa giò via di sò man. ⁸E l'angiul el gh'ha dii: «Sceng e liga suta^[4] i tò sandaj». E l'ha faa inscì. E 'l gh'ha dii: «Mett tì sü el tò vestii^[5], e va adree a mì^[6]. ⁹E despö che l'era naa föra, l'è naa adree e l'aveva minga savüü che l'era vér chèll che l'è sücess per mèzz de l'angiul; ma 'l pensava che 'l vedeva una visiún. ¹⁰Ma quand eren passaa la prima vardia e la segunda, hinn vegnüü a la porta de fèrr che la menava in de la citaa, che l'ha dervii de sé per lur, e despö che eren vegnüü föra, hinn naa inanz una strada, l'angiul l'ha partii de lü.
¹¹E quand Peder l'era vegnüü a sé medemm, l'ha dii: «Adèss savi veramént che Diu l'ha mandaa föra 'l sò angiul e 'l m'ha liberaa de la man d'Erod e tütt el pért^[7] de la gént di Giüdee. ¹²E despö che 'l l'aveva capii, l'è naa a la cà de Maria, la mader de Giuann, che l'è suranuminaa March, due eren personn tant assee che eren vegnüü insèma e pregaven. ¹³E quand l'aveva picaa a la porta del purtegh, una sèrva de nomm Rode l'è vegnüü vesìn per scultà, ¹⁴e despö che l'aveva ricunussüü la vús de Peder, per la letizia l'ha minga dervii la porta, e despö che l'aveva curs denter, l'ha nunziaa che Peder el stava denanz al purtegh. ¹⁵E lur gh'hann dii: «Te see matt^[8]!» Ma l'ha daa cunferma che l'era inscì^[9]. E lur diseven: «L'è 'l sò angiul». ¹⁶E Peder el cuntinuava a picà; e despö che l'aveva dervii la porta^[10], l'hann vedüü e hinn staa sbalurdii. ¹⁷E despö che 'l gh'aveva daa sègn cun la man de tas, el gh'ha cüntaa sü cuma el Signúr el l'ha menaa de la presún, e l'ha dii: «Nunziee a Giagum e a i fradèj chèstcoss», e despö che l'era naa föra, l'è naa a un alter lögh.
¹⁸E quand el dì l'era vegnüü, el gh'era tümült, no piscinìn, intra i suldaa: «Dunca, che cossa l'è devegnüü de Peder?». ¹⁹E Erod, despö che 'l l'aveva cercaa e 'l l'aveva minga truaa, e l'aveva interugaa i guardiann, l'ha cumandaa che lur füssen menaa via, e despö che l'era naa giò de Gerüsalèmm l'ha restaa a Cesarea.
²⁰E l'era tant rabiaa cuntra i Tir e i Sidoni; e cunt una sula mént, s'hinn presentaa a lü e, despö che aveven persuadüü Blast, che l'era sura la stanza de lètt del rè, dumandaven pas perchè 'l lur paés el füss sustegnüü de la roba del rè. ²¹E in del dì stabilii, Erod, metüü sü del vést del rè, setaa sül tron, l'ha faa un discors a lur, ²²e 'l popul el criava föra: «Una vús d'un diu e no d'un vèss üman!». ²³E sübit un angiul del Signúr el l'ha culpii, perchè l'aveva minga daa gloria a Diu, e l'ha spiraa föra la vita, essend devegnüü mangiaa di vèrm.
²⁴E la parola de Diu l'ha cressüü e l'ha multiplegaa.
²⁵E Barnaba e Saul hann giraa indree a Gerüsalèmm despö che aveven cumpii 'l servizi, avend ciapaa insèma cun lur Giuann, che l'è suranuminaa March.

1. ↑ leteralamént, l'era piasevul
2. ↑ o pichètt
3. ↑ o cà, presún
4. ↑ o laza
5. ↑ o abet, pagn, vestii, mantèll
6. ↑ o seguimm
7. ↑ o tüta l'aspetativa
8. ↑ o vanesciet
9. ↑ leteralamént, l'ha afermaa d'avègh inscì
10. ↑ el test grech el manca la porta

• ← Indree a Capitel Vündes
• Inanz a Capitel Trides →
• A l'indes