Turiximo

O turiximo (ciammou ascì turismo, da-o franseise tour, gio ò viægio)^[1][2] o l'è l'insemme di serviçi e attivitæ relative a viægi e a permanensa feua da-a pròpria cà.^[3]

Quelli ghe gödan di serviçi ligæ a-o turiximo se ciamman turisti.

Inte quarche antiga çiviltæ, s'òsserva unna çerta mersa de mobilitæ da parte de-e classe ciù erte, sponciâ da de raxoin religiose, de studdio, sportive ò de trattamento spa, che son vexiñe a-o conçetto contemporanio de turiximo. Inte l'Etæ de Mezo, in azzonta a-i peregrinaggi crestien inti pòsti sacri, quelli di mossulmoen che se dirizzeivan verso a Mecca an piggiou de importansa ascì; co-a nascion de primme universcitæ, s'é azzonto i viægi de studioxi e studenti, coscì comme quelli di artisti invitæ a-e varie corte.

Sto periodo o marca o comenso d'unn'organizzaçion de alloggio de tipo albergo, ch'a s'azzonze à l'allöggio privou e a-e penscioin religiose, comme demostrou da-o desviluppo de profescioin ligæ à l'òspitalitæ. Into Renascimento, tanto che i peregrinaggi inti santuäi a-i santi e a Maia ean reduti inti territöi toccæ da-a Reforma protestante, gh'ea un dexidëio crescente de inricchïse o spî con de esperiense personale. À partî da-o secolo XVI, l'é stæto registrou ben ben de viægi pe de raxoin coltuæ, coscì comme commerçiæ e militæ, de quæ gh'é de descriçioin into detaggio. Çertidun de sti viægi peuan ëse assoçiæ co-o grand tour, unna prattica ch'a l'é vegnua popolâ tra i zoeni gentlemen ingreixi di secoli XVIII e XIX, coæoxi d'esplorâ l'Euròpa continentâ. A Revoluçion Industriâ e a nascion d'unna çiviltæ urbaña, insemme à de neuve forme de communicaçion, an portou a di scignificativi cangiamenti into settô do turiximo. L'é stæto de l'Euttoçento che o termine "turista" o l'é compario pe-a primma vòtta inta lettiatua ingleise, ch'o ne vëgne da-o franseise do secolo XII torner e da-e poule a lê ligæ. L'introduçion da ferrovia, mascime di treni pe-e escurscion inta Bretagna da meitæ do XIX secolo, a l'à zugou un ròllo fondamentâ inte l'allargâ a parteçipaçion de sempre ciù gente into turiximo.^[3]

O turiximo o l'é importante pe-a cresciansa econòmica d'un Paise. O l'aggiutta à stimolâ a domanda globale, o crea di pòsti de travaggio e o l'é unna vivagna scignificativa de scangio. Pe de ciù, o contribuisce à l'equilibrio into balanso di pagamenti. Inte çerti Paixi, o reddito do turiximo o l'é pægio a-o reddito de l'esportaçion. E forme de turiximo ciù popolæ son o turiximo in sciô mâ e in sciâ montagna (festivitæ d'estæ e spòrt d'inverno), ma ascì o turiximo coltuâ, ch'o se conçentra inte çittæ con un ricco patrimònio istòrico e artistico, o turiximo da natua, ligou a-i parchi, e l'agrituriximo, saiva à dî l'òspitalitæ inte fattoie. Insemme a-i alberghi, l'offerta de allöggi alternativi comme case privæ, campi e ostelli a l'é cresciua ascì. Do 1999, l'Italia a l'à guägno 51.745 miliardi da-e intræ do turiximo e a l'à speiso 30.732 miliardi, con un saldo poxitivo de 21.013 miliardi. I foresti ch'an vixitou l'Italia ean 127.806.000, sorvetutto todeschi, franseixi, ingreixi e americhen, e dapeu i giapponeixi. Gh'ea 42.589.000 italian in vacansa do 1999, a-i quæ s'à da azzonze 32.094.000 foresti. O numero di italien che çernan d'anâ in vacansa à l'estranxeo o l'é apreuvo à cresce. I flussi de turisti son ben ben stagionæ, conçentræ sorvetutto inti meixi de luggio e d'agosto. O Veneto a l'é a region italiaña co-o ciù erto numero de turisti, apreuvo gh'é o Trentin-Erto Adige e l'Emilia Romagna. Atre regioin importante son a Toscaña, a Lombardia, o Laçio e a Liguria.^[2]

1. ↑ (LIJ, IT, EN) Conseggio pe-o patrimònio linguistico ligure, Deize, diçionäio italian-zeneise - turismo, in sce conseggio-ligure.org. URL consultòu o 27 agòsto 2024.
2. ↑ ^{2,0 2,1} (IT) Turismo, in sce sapere.it. URL consultòu o 27 agòsto 2024.
3. ↑ ^{3,0 3,1} (IT) Turismo - Enciclopedia on line, in sce treccani.it. URL consultòu o 27 agòsto 2024.

• Wikimedia Commons a contêgne di files in sce turiximo