San Bærnabè

San Bærnabe' apostolo, pr. /bɛrna'bɛ/ (ò inte'na forma ciu italianizante Bàrnaba), (Çipro, ... – Salamiña, 11 zugno 61). Se festezza l'11 de zugno.

Patronæghi: Çipro, Antiocchia. O l'è invocao contra a gragnœua.

O nascette da di Giudei da tribù de Levi, che s'ean rifugiæ a Cipro quande-o Pompeo o Grande o l'invaze a Palestiña. A 12 anni o fu mandao a Geruzalemme dond'o frequentò a scœua do Gamaliælo e o strenze' 'na cordiâ amixiççia con doi condisceppoli: o Steva e o Saolo. Ean tutti trei da mæxima etæ e doveivan un giorno tutti trei versâ o so sangue pe Gexo Criste e pe-a so Gexa nascente.

O Sarvao intanto o començava a impî a Giudea di so prodiggi, e 'na folla grandiscima a g'anava aprœuvo entuxasta. Intœ-uña de tante votte ch-e-o Gexo o se recò a Geruzalemme, o l'andò a-a pisciña probattica, e chie o g'atrovò 'n ommo de trentœutt'anni maròtto, e o ghe domandò: « Vœutto êse guajo? ». E quello o rispoze: « Segnô, mi no g'ho nisciun chi me mette inte l'ægoa quand'a l'è bolezumme ». Aloa o Segnô, mosso a compascion, o ghe comandò: « Tiite sciù, piggia o to letto e camiña ». E quello o s'îsò e o fu san in sce l'instante. O Bærnabe' prezente à sto prodiggio, o credette in Gexo e o ne vègne fedele disceppolo.

Doppo a Pentecoste, quande i Apostoli començon a so predicaçion fra i paghen, o Bærnabe' o fu mandao a Antiochia. Avendo ótegnûo in questa çittæ un nummero conscideieive de converscioin, e voendo ampliâ o campo do so apostolato, o Bærnabè o pensò a-o Saolo, che doppo a so converscion o s'ea retiao a Tarso. O ghe andò, o-o trovò e o condusse à Antiochia.

Doppo avei demoao ciu de 'n anno in questa çittæ, avègne che-o Sprito Santo o feççe segregâ i doi apostoli Bærnabè e Saolo pe-a miscion a-a quæ o-i l'aiva assonti. Riçevettan aloa a pineçça do sacerdoççio, l'episcopato, doppodechè abandonon Antiochia e conduxendo con lê o Zane Marco (o futuo Marco evangelista e parente do Bærnabe') se recon a Cipro, da pœu a Salamiña e a Paffo donde-o proconso Sergio Paolo o se convertì. Chie o Saolo o muò o so nomme in Paolo. Partii da pœu da Paffo andon a Perge in Panfillia mentre o Zane Marco o tornava a Geruzalemme. Cacciæ de là, razonsan Iconnio; chie o Segnô o ghe dette 'na gran consolaçion: a converscion da vergineTecla. Doppo andon a Listri e in tante atre çittæ inte quæ œuvion numioze converscioin.

Doppo o Concillio de Geruzalemme, essendose o Zane Marco rœünio a-o Bærnabè, o Paolo o se separò da liatri, e pigiao o Scila con lê, o partì pe l'Axa Menô, mentre o Bærnabe' e o Zane Marco feççan veja pe Cipro. A tradiçion a ne dixe che-o Bærnabe' o percorì ascì l'Egitto e l'Itallia.

Tornao a Cipro o se stabilì a Salamiña e o convertì tantiscimi izoen. Ma i Giudei, adiræ pe-o ben ch'o fava, s'impadronin de l'apostolo, e doppo aveilo fæto ben sofrî l'alapion (11 zugno do 60 ca.). O Zane Marco o ne sepellì e preçiose reliqque inte 'na caverna.

Do 485 o santo martire o l'aparse a l'Antemio, vesco de Salamiña, rivelandoghe o lœugo da so seportua. Insce-o so peto fu trovao un exemprâ de l'Evangeio de san Matê, scrito in ebraico de so proppia man.

• www.santiebeati.it
• www.santodelgiorno.it

• Wikimedia Commons a contêgne di files in sce San Bærnabè