Wide-field Infrared Survey Explorer
Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.
De Wide-field Infrared Survey Explorer, aofgekort tot WISE, is 'ne ruimtetelescoop, dee loert in 't infraroedspectrum. Heer is gelanceerd op 14 december 2009 um 6:09 plaotseleken tied (15:09 Nederlandsen tied) vaanaof de Vandenberg Air Force Base in Californië, VS, woebij gebruuk woort gemaak vaan 'n Delta II draagrakèt..
't Doel vaan de ruimtetelescoop is um in 'n baon op 525 km huugde zoegood es de gaanse ruimte boete de Eerd te fotografere. Tijdens de 10 maond dorende missie weurt eder positie in de ruimte minimaal 8 kier gefotografeerd. In totaol weure 2 miljoen foto's gemaak mèt 'ne beleechtingstied vaan 11 seconde. De instruminte aon boord vaan de satelliet zien 1000 kier mie geveuleg es aander instruminte tot noe touw in de ruimte, zoewie IRAS, AKARI en COBE.
De ruimtetelescoop vluig in 'n cirkelvörmige, polair, zon-synchroon baon um de Eerd, euver de sjeiing tösse daag en nach op de Eerd. Daorum voond de lancering ouch plaots bij zonsopkoms.
Op 30 december 2009 woort de besjermkap vaan d'n telescoop verwijderd. De telescoop kin noe veur 't iers ech leech woernumme.
